WILLEMSTAD.- Banko Sentral di Kòrsou i St.Maarten ta kompartí e preokupashon ekspresá pa Banko Sentral ulandes (DNB) i e minister ulandes di finansa Wopke Hoekstra relashoná ku e konfiansa den e instituto Banko Sentral di Kòrsou i St.Maarten. E minister ulandes a ekspresá su preokupashon den un karta na Tweede Kamer den kua e ta e ta indiká ku gobièrnu ulandes i Tweede Kamer no tin konfiansa den Banko Sentral. Gerensia di CBCS ta rekonosé i kompartí e preokupashon ekspresá.

Na opinion di e aktual gerensia di Banko Sentral, e preokupashonnan pa loke ta trata integridat i konfiansa den CBCS no ta nada nobo, esakinan ta situashonnan ku DNB a mustra riba esakinan. E aktual gerensia ta mustra ku for di momentu ku nan a asumí e funshon komo gerentenan nobo den e instituto na novèmber 2017 nan a topa un situashon kaminda mesora a nota ku mester a hasi kambionan pa garantisá e integridat i konfiansa den e instituto.

Den último 18 lunanan gerensia a tuma vários medida kualnan mester kondusí na rekobrá e konfiansa den CBCS komo instituto enkargá ku supervishon. Tin un akuerdo (MOU) firmá ku DNB riba tereno di interkambio di informashon. Ademas ta asina ku formalmente tin tres enkuentro pa aña kaminda den un reunion tripartit entre e institutonan enkargá ku supervishon den reino ta traha na uniformidat pa loke ta trata supervishon.

E aktual gerensia di CBCS ta spera ku e nombramentu di un presidente nobo di Banko Sentral e hunta direktiva lo ta ainda mas fuerte pa kontinuá ku e proseso di hasi e instituto ainda mas profeshonal. Mas detaye den edishon di EXTRA.