Ministerio Públiko por a proba  33 mil florin so

WILLEMSTAD.- E akusado femenino E.B. (43) a presentá den sala di korte ayera, akusá di a malversá su doño di trabou Delifrance e suma di 33 mil florin.

E.B. ta keda akusá di a  kometé e akto den periodo di 1e di mei 2013 te ku 30 di novèmber 2014. Segun e akusashon el a hasi mal uso di su funshon komo “manager” pa kometé su akto.

Tabatin otro kolega ku tambe lo a hasi su mes kulpabel na e akto aki, pero aparentemente a hui bai Colombia.

E akusado femenino tabata manager di e kompania i tabata bai depositá e benta di dia na banko.

Pero tabatin dia ku e no tabata hiba e sèn òf ta depositá un parti, miéntras sobrá ta bai den su saku.

Ayera el a atmití su kulpa i  bisa ku motibu ku el a malversá e plaka, tabata pasó e ta’tin hopi problema familiar.

El a bisa segun su kalkulashon, el a malversá 33 mil florin.

Gerensia di Delifrance ku tambe tabata den sala ayera a splika segun nan informashon bankario, e sèn ku a keda malversá ta 270 mil florin.

E akusado a bisa ku e ta dispuesto pa paga i a kuminsá paga un kantidat ku a suma di 3 mil florin te ku awor.

Segun gerensia, el a kuminsá paga bèrdat aña pasá entre otro 100 pa 150 florin pero tin luna e no tabata paga mas.

Fiskal Schoop durante su rekisitorio a bisa ku ta difísil pa akusá E.B. di e montante di 270 mil florin manera e gerensia a trese dilanti, pasó tabatin un otro empleado tambe ku lo a malversá for di e negoshi.

E úniko plaka ku Ministerio Públiko por akus’é di dje ta e montante di 33 mil florin ku e akusado mes ta bisa ku el a malversá.

Mirando esaki fiskal ta haña e akusashon probá i ta demandá e akusado 3 luna kondishonal ku tempu di prueba di 2 aña, mas 1 aña  di kastigu kondishonal. Den e periodo ei e tin ku paga e 29 mil florin ku a sobra kitando e 3 mil florin ku el a paga kaba.

Fiskal a apliká e sistema di “schade vergoeding maatregel” ku ta enserá  1 dia será pa kada 350 florin.

Si  aki un aña e no kaba di paga e montante palabrá, e tin ku sinta 3 luna i si e paga nada e tin ku sinta 6 luna di prizòn.

Hues Snitker den su desishon a bai kompletamente akuerdo ku fiskal.