WILLEMSTAD.-  Ta yega un kaminda ku mester kuminsá tuma akshon kontra di esnan ku despues di a haña vários  atvertensia, ainda ta opta di no kumpli ku lei. Esaki Gerensia di Marshe a kuminsá hasi.

Despues ku for di aña 2017 a kuminsá duna atvertensia na sendedónan ku tabata bende remedi òf produkto di un forma ilegal, a yega na e punto ku mester a duna karta na 5 bendedó kaminda ta informá nan ku nan ta keda retiro for di Plaza Nobo.

Esaki despues ku apesar ku nan a haña vários atvertensia, nan a sigui bende produkto i remedi ilegal den Plaza Nobo di kual kada biaha ta bin topa ku nan bek durante kontrol. Den pasado a asta yega di tene sigur 3 seshon di informashon pa asina por informá tur bendedó i tambe mustra nan kiko por bende i kiko no por bende.

Tambe a informá nan ku den kaso di sierto remedi i produkto, botikanan lokal tin e lisensia pa por bende nan debí ku tin siguransa ku e remedinan ta original, e sendedónan den Plasa Nobo no. Gerensia di Marshe asta a yega di haña keho di klientenan ku a yega di kumpra remedi i produkto, pero ku nan a resultá malu i asta esakinan tabatin resultado fatal.

Djaluna último tabata e último dia di e sinku bendedó nan den Plasa Nobo i gerensia di Marshe lo sigui tuma medida kontra di e otro bendedó nan ku no kumpli.