WILLEMSTAD.-Den un karta dirigí na gobièrnu di Kòrsou i spesífikamente na Konseho di Minister e direktor interino i hunta di komisario di Refineria di Kòrsou ta hasi un petishon pa haña indemnisashon (vrijwaring) Konseho di Minister den un desishon di akshonista di RdK di 22 di desèmber 2019 a sera un akuerdo di kompra i benta ku Klesch NV, relashoná ku benta i traspaso di e terminal na Bullenbaai, e refineria na Emmastad i e planta di utilidat.

Marcelino de Lannoy Direktor di Refineria di Kòrsou

Tantu RdK komo Curaçao Refinery Utilities (CRU) ta konfrontando for di 15 di yanüari 2020 ku gastunan hopi haltu pa mantenshon di e fasilidatnan i tambe kuponan di trabou di e eks trahadónan di Refineria Isla. Sinembargo e entradanan ta hopi abou. Ta tene e fasilidatnan parsialmente den operashon pa kumpli ku e plan B3 den koperashon ku Curoil. Pa medio di e plan ei ta suministrá komunidat ku kombustibel. E gastunan di kombustibel a wòrdu finansiá pa rdK te ku 30 di yüni 2020 i komo tal RdK ta haña pago bek parsialmente.

CRU ta saka su fakturanan na otro partidonan pa loke ta trata almasenahe di produktonan petrolero, pero sin ku ta hañando pago pa esei. E refineria na Emmastad ta kompletamente plat. Ku e meta pa generá fondo pa e kompania RdK a kuminsá eksplorá e posibilidat pa hasi uso di e fasilidatnan na Bullenbaai pa almasenahe. E fondonan ku esaki produsí lo por yuda hopi bon pa kubri gastunan ku ta oumentando. Sinembargo CRU no a logra yega na akuerdo ku Klesch. Un investigashon a e demostrá ku tin sufisiente interes den Kòrsou su fasilidatnan. RdK/CRU den komunikashon ku Klesch a informá di tur intenshon pa hür e fasilidatnan pa almasenahe, ounke ta pone den kada kontrakt ku na momentu ku e dil ku Klesch sigui ku por stòp e hür pa almasenahe. Sinembargo Klesch ta opiná otro i a ‘claim’ rdK/CRU i asta a pone e direktor interino personalmente responsabel. Pa e motibu aki ku e hunta di komisario i direktor interino ta pidi indemnisashon.