WILLEMSTAD.- Gerensia di Sentro di Detenshon i Korekshon Kòrsou (SDKK) a tuma nota, ku den medionan di komunikashon a sali publiká ku un detenido lo a drenta wèlga di hamber, pa motibu ku e ta protestá kontra e situashon den SDKK esta  ku pa motibunan di seguridat  detenidonan tin ku keda será mas ku 21 ora den nan sèl.
Gerensia di SDKK ta partisipá ku e informashon eróneo ku prezunan ta keda 21 ora será den nan sèl no ta basá riba bèrdat.
Sí ta bèrdat ku tin dos detenido ku a nenga di kome loke a ser preskribí dor di dietista i e detenidonan aki ta alimentá nan mes di otro forma.
Pues e informashon ku tin detenido den wèlga di hamber no ta basá riba bèrdat.
Gerensia tin atenshon pa e situashon.

Extra ta kere ta bon pa minister di hustisia pone mas seriedat na e situashon den prison ya ku sea gerensia no sa kiko ta pasando of tin otro motibunan. E informashon di e luchtbeleid ta di presunan mes el a bin i ku prueba

i nos ta publika aki tambe e memo ku a pega na muraya den e bloknan den wikent. E presunan den blok 4 a bisa extra ku ta hopi tempu kaba ta esei ta e luchtbeleid serka nan. Awe ora e publikashon a sali a bai bisa e presunan ku ta wega a hasi ku nan. Gerensia di prison i minister sa kiko ta pasando eiden of ta kere ku loke ta pasa den prison ta keda skondi?

Pa loke ta e welga di hamber of welga di kome, nos por bisa ‘whats in the name’. Ta loke ta pasando den prison ta importante pa atende i hopi urgente. Gerensia i minister mester stop di hasi manera tur kos ta kanando segun regla den prison. E presunan tin di hanja nan kastigu manera mester. Pero lastimamente aki fo nos tur sa e situashon eksplosivo den prison, ta gerensia i minister so no sa.