WILLEMSTAD.- E situashon di Gerrit Schotte awor komo detenido den Sentro di Detenshon i Korekshon Kòrsou (prisòn) no ta nada bon. Ora el a kere ku e lo keda tratá igual ku otro prezunan, parse ku e situashon ta diferente.

EXTRA tabatin kontakto ku defensa di Schotte i nos a  komprondé ku su situashon no ta nada bon. E ta keda kalifiká komo kastigu riba kastigu. E ta sintando un kastigu despues ku te den korte di kasashon a konfirmá su sentensia di 3 aña prisòn. E tin aktualmente 12 dia será, despues ku el a disidí ku e ta bai entregá su mes pa evitá ku tin di bai busk’é na su kas, dilanti di su famia.

Su promé desapunto tabata ora el a kere ku e por hasi uso di ‘Zakenbezoek’ pero a resultá ku no por. E defensa a splika ku un kaminda ta bisé ku e tin derechi riba ‘zakenbezoek’ pa asina por kaba di regla loke a keda na mitar di su fundashon akifó i di otro banda Schotte ta tende di gerensia di prisòn no ta eksistí ‘Zakenbezoek’.

Si ántes famianan por a hiba televishon i fan pa nan sernan kerí den prisòn, awor esakinan mester kumpr’é den prisòn. I den su kaso, su hendenan a depositá 500 florin pa Schotte pa e por usa pa kantina i tambe elektrónika. Despues Schotte a komprondé ku e sèn di elektrónika mester ta apart i komo tal su hendenan a depositá 500 florin mas.  E elektrónika entre otro ta pa e por haña lus den su sèl ya ku ora e ke lus anochi, ta sende lus den henter e blòk strobando otro prezunan drumi. I p’esei el a paga pa e por haña lus den su sèl.

Awor Schotte ta keda informá ku e 500 florin pa desèmber a kaba i e tin di warda pa usa e otro 500 florin te yanüari. Konsekuentemente e no por kumpra nada mas di kome na kantina i nada mas ku e mester.

Ounke kuantu el a protestá, e ta dal den muraya i mas muraya. Un kaminda ta bisé ku e tin derechi riba e otro 500 florin i otro kaminda ta bisé ku e tin di warda te yanüari.

Defensa di Schotte ta konsiderá esaki komo kastigu riba kastigu. E no por haña bishita siendo un persona ku tin un fundashon di kaba di regla i tampoko por kumpra kuminda na kantina. Esaki ta e situashon di Gerrit Schotte aktualmente.