WILLEMSTAD.-E último dianan aki atrobe tin hopi atenshon tur dia pa e sifranan relatá na Covid-19. Epidemiólogo dr. Gerstenbluth a splika ku algu ku nan ta notando ta ku e edat di hendenan kontagiá ta subiendo. Algun siman promé por a mira ku mas tantu hóbennan ta keda infektá pero awor ta mira ku esnan di edat ta keda infektá.

E sifranan di awe ta mustra ku tin 72 kaso di hende infektá ku Covid i ta solamente 1 ta importá, pues ta nifiká ku e sobrá 70 kasonan ta hendenan lokal ku ta infektá. Segun e profeshonalnan di salu, ta importante pa hendenan infektá kontesta preguntanan ora ku hasi esaki den kuadro di ‘contact tracing’. E tim no ke sa selashi di niun hende pero nan ta notando ku hendenan mas hóben ta keda infektá i ta bai kas i pega hendenan di edat.

Den un investigashon ku a hasi, di e hendenan ku si ta duna boka unda nan a bai, por nota ku beachclub ta un di e sitionan ku mas a keda menshoná komo un sentro di kontagio. Fiesta i entiero ta e siguiente sitionan unda tambe kontagio ta tuma lugá. Mas detaye den edishon di EXTRA.