Walk-in pa indokumentado for di mayan

WILLEMSTAD.- Dr. Izzy Gerstenbluth ta hopi konsiente ku mayoria hende den komunidat ke pa relahá medidanan den kuadro di Covid. Sinembargo ta bon pa realisá ku e medidanan ta pa sòru ku hendenan no ta infektá otro. E kantidat di hendenan ku ta bakuna ta duna protekshon di keda kontagiá. E kantidat di kasonan pa dia a baha, pero tin hopi hende interná ainda den hospital. Den último 4 siman a dòbel e kantidat di kasonan na Kòrsou. E epidemiólogo a indiká ku mester komprondé ku ora ku relahá e kasonan di kontagio por subi bek anto hopi lihé i na momentu ku esei sosodé lo mester bolbe bini ku medidanan severo.

E kantidat di mortonan a bira 4x mas tantu den apénas algun siman, pues ta motibu pa keda alerta. Gobièrnu i profeshonalnan den salubridat publiko ta konsiente ku no por keda tene tur hende sera den e pais aki. Tene kuenta ku e variante nobo, esta e variante Britániko ta esun ku ta kontagiá kasi 100% di kasonan. E variante britániko ta mas kontagioso, e ta plama lihé ke men ora suavisá e chèns ta grandi ku ta subi e kontagio. Pa e motibu ei e rekomendashon ta pa keda kas, mantene distansia i bai bakuna.

Gerstenbluth a dediká un poko atenshon na algun hende ku a skohe pa ataka nos profeshonalnan den salubridat publiko, den kua a bisa ku profeshonalnan lokal lo ke mata e pueblo aki. Gerstenbluth a splika ku e úniko meta ku tur profeshonal den salubridat publiko tin ta pa kuida i salba e poblashon. Tin hendenan ta pretendé ku mester keda sin tuma medida i laga tur hende haña e vírus i situashon mes lo normalisá. El a mustra riba e desaster na Brasil unda a laga e situashon pa su kuenta i awor tin gran kantidat di morto i hendenan infektá. Si no frena e vírus anto por spera ku aki tambe lo pasa mesun desaster ku na Brasil.

Dr. Jerry Semper na su turno a splika ku bakunashon tin vários benefisio, unu importante ta ku esun ku bakuna ta protehá esnan rondó di dje tambe. Den un pandemia hende no por keda wak pa e so mas, pero mester wak e kolektividat. Tambe el a anunsiá ku entrante mayan djarason 21 di aprel ta kuminsá ku walk-in pa hendenan indokumentá. No mester traha sita. Tur hende indokumentá por bai bakuna. Mas detaye den edishon di EXTRA.