KRALENDIJK – Gezaghebber di Boneiru, Edison Rijna ta deskonsehá siudadanonan boneriano pa biaha pa Kòrsou, mirando kon e situashon di Covid-19 a sali fo’i man riba e isla ei, te asta ku mester a aselerá medida den forma drástiko. Asta lei seku a inrodusí, riba tur e medidanan ku tabatin kana.

Ayera tardi tabatin otro konferensia di prensa den kua Rijna a duna último informashonnan tokante e situashon na Boneiru, relashoná ku e pandemia di Covid-19. Marian Luinstra di e departamentu di Salubridat Públiko tambe tabata presente.

Segun Rijna, e dianan ku a pasa el a komprondé ku tin basta preokupashon den komunidat boneriano relashoná ku e situashon na Kòrsou. El a bisa ku e preokupashon ei ta di komprondé. E ta deskonsehá hende tambe di Boneiru pa biaha pa Kòrsou den e situashon aktual. Pero hendenan ku ke bai Kòrsou tòg, e ta pidi nan pa tene reglanan di distansia sosial, usa tapaboka i usa handsanitizer.

Rijna a bisa ku Boneiru tin entre 1 pa 5 kaso aktivo, òf ta bini aserka. Tanten ku ta den e márgen aki no tin motibu pa eskalá medida. Pero ta tene bista tambe riba e situashon di Kòrsou na bista. Eskalashon di medida relashoná ku e situashon na Kòrsou por yega te den ekstremo pa sera frontera ku Kòrsou. Pero te asina leu no ta asina leu.