WILLEMSTAD. - Meta di World Health Organization (WHO) ta pa mundu yega na inmunidat kolektivo ku ta 85% di poblashon mundial pa ta vakuná. Manera konosí aki na Kòrsou e kampaña di vakunashon a duna un bon resultado i Kòrsou te ku ayera a yega na 88.688 persona ku a risibí nan promé vakuna, miéntras 78.439 persona a risibí nan di dos vakuna i te ku ayera tin na total persona registrá pa risibí nan promé vakuna 89.860. Na total tin 167.127 vakuna apliká. Awor a yega e momentu pa kuminsá vakuná muchanan entre di 12 - 17 aña di edat.

Dr. Jerry Semper a splika EXTRA ku lo sigui vakuná pa semper, mas ku ayera “gezondheidsraad” a duna lus bèrdè pa muchanan di 12 aña te ku 17 aña por kuminsá vakuná. E tim di vakunashon ta preparando ful pa kuminsá vakuná muchanan.

E investigashon riba muchanan ku nan edat ta entre di 0 - 12 aña tambe ta kasi kla. Pues esaki ta pone ku semper lo keda vakuná, dr. Semper a bisa.

Esaki tambe lo yuda pa yega mas lihé na inmunidat kolektivo, pa motibu ku si 72% di adulto, hóbennan i muchanan vakuná, ta nifiká ku 72% sigur di bo komunidat ta vakuná.

Na opinion dr. Semper, ideal ta pa sigui vakuná pa yega 85, 90 òf asta 95 porshento di poblashon ku ta vakuná. Esei lo ta na su lugá dr. Semper a añadí.