WILLEMSTAD.- Djasabra atardi último promé minister di Kòrsou Gilmar “Pik” Pisas (MFK) a sali for di hospital, despues di tabata interná for di djárason dia 24 di mart debí na un kaida den su kas.
Presidente di partido MFK, sr. Sithree van Heydoorn a duna di konosé na EXTRA ku sr. Pisas a sali djasabra atardi for di hospital i ku e ta hopi bon di salú. E wowo kaminda sr. Pisas a haña mayoria sla den su kara, no ta habri kompleto ainda, i ta warda dianan bai, p’e herida baha, p’e wowo ta normal bèk.
Mas aleu sr. van Heydooorn a bisa ku el a papia ku Pisas p’e keda trankil, i e tim di negoshashon di MFK pa un gobièrnu nobo lo ta den konsulta konstantemente kuné, i pa mantené informá di tur e desaroyonan. Den un bishita ku sr. van Heydoorn a hasi serka Pisas, a inform’é kon nan ta negoshá ya e ta na altura kiko e tim di negoshashon di MFK ta hasiendo. Pa awor aki, ainda sr. Pisas lo tuma algun dia mas pa sosegá e kurpa.
Manera ta konosí direktiva di partido MFK mes a informá djárason mainta tempran, ku nan lider máksimo a kai den kas. E insidente aki a sosodé alrededor di 5 or di mainta. Parse ku sr. Pisas a kai den kas i kap su kabes, i ambulans a hiba Pik CMC. Na momentu ku el a keda hosptialisá su kondishon tabata stabil. Sinembargo dòkternan a opta p’e keda hospital pa opservashon, i tambe p’e por sosegá e kurpa sin preshon. Ademas a hasi vários tèst kuné. Pero for di djasabra sr. Pisas ta na kas.