WILLEMSTAD.- Fundashon Beeldentuin Blue Bay a añadí un eskultura nobo i impreshonante na su kolekshon. Djaluna 27 di yanüari, ‘Palu di Spiritu II’, un obra maestral di e artista renombrá di Kòrsou, Giovanni Abath, a ser revelá ofisialmente den presensia di e artista mes.

Giovanni Abath, a nase i krese na Kòrsou, ta un artista konosí pa su eskultura inovativo i instalashonnan ku ta hasi un konekshon entre herensia lokal i arte moderno. Su obra, ku ta kombiná materialnan manera ‘stainless steel’, palu i heru, por ser atmirá na lugánan públiko manera Brionplein i na Beeldentuin Blue Bay.

‘Palu di Spiritu II’ ta e susesor di e obra anteriormente  konosí di Abath i ta reflehá e  konekshon fuerte entre naturalesa, kultura i forsa spiritual di Kòrsou. E eskultura ta referí na e palu indígena Casearia Tremula òf Geelhout, konosí lokalmente komo ‘kenepa spiritu’, un palu ku tin un balor simbóliko hopi haltu riba e isla. E obra di Abath ta emaná grandesa i forsa. ‘Palu di Spiritu II’ ta para komo un warda i ta rekordá nos ku bo por haña rais asta den e bientunan di mas furia.

‘Palu di Spiritu’ tambe tin un ròl sentral den e pelíkula premiá ‘Buladó’ di aña 2020, ku a haña hopi elogio na e Festival di Pelíkula Hulandes i a gana e premio di  Gouden Kalf pa e mihó pelíkula. Den e pelíkula, e eskultura ta simbolisá konekshon, forsa i transformashon. Giovanni Abath no ta solamente un artista pero tambe un embahador kultural di Kòrsou. Su obra, aparte di ‘Palu di Spiritu’ ta inkluí instalashon manera Man of Steel ku por wak den Beeldentuin Blue Bay, i History in Motion na Brionplein, ta demostrá su versatilidat i profundidat.

Den su tayer i galeria, e 7.1 Experience na Landhuis Morgenster, bishitante por deskubrí mas di su obra úniko.

Beeldentuin Blue Bay ta habrí tur dia i por ser bishitá grátis, ofresiendo un eksperensia úniko di arte i naturalesa. Pa esnan ku ke sa mas di e eskulturanan, tin rekorido di guia ku un karèt di gòlf pa un kontribushon chikí. Pa skolnan spesífikamente, tin un proyekto edukativo ‘Schoolvoorbeeld’, ku ta introdusí skolnan na un manera inspirativo na e eskulturanan kreá pa artistanan di Kòrsou.

www.sculpturegardenbluebay.com