WILLEMSTAD.- Despues di e “beslag” ku GiroBank a pone riba Marchena Hardware por spera mas akshon di e banko pa asina atendé ku su fiansanan ku ta presta malu i asina logra haña algu di kèsh aden. Segun EXTRA a prepará un proseso pa pone “beslag” riba un konosido kontratista na Kòrsou debí na un debe astronómiko ku esaki tin na e banko.

Pa kolmo ta trata di un kontratista ku ta traha hopi serka ku gobièrnu den proyektonan di konstrukshon. Tur kos ta kla pa pone “beslag” i ta djis e desishon final mester kai pa realmente “deurwaarder” ehekutá esaki. Pregunta ta sinembargo si e ehersisionan aki ta logra skapa e banko.

Tambe tin un otro findishi na kaminda di un tereno ku ta para komo garantia pa un fiansa mionario na e banko.

Resientemente a bende tambe Plaza Hotel, ounke bou di balor, pero tòg asina a logra haña algu mas ku 6 mion florin, ku ta kèsh ku e banko tin hopi mester di dje.

For di 2013 GiroBank ta bou di supervishon di Banko Sentral i aña pasá novèmber a disidí di fris tur operashon di GiroBank. Na desèmber e banko a habri su portanan atrobe pero depositantenan por a lanta un máksimo di 10 mil florin for di nan kuenta bankario. Esaki a hinka hopi negoshi na Kòrsou den problema.

Notarionan ku tabatin sumanan depositá riba nan “derdenrekening” por ehèmpel no por a pasa sierto akta mas. Refineria Isla BV ku mester kaba di paga su eks trahadónan plaka di sesantia  te awe ta indiká ku ainda nan tin vários mion florin pegá den GiroBank.

Fondo di penshun APC ku ta akshonista di GiroBank tambe tin suma kuantioso pegá den e banko.

Aktual minister di Finansa, Kenneth Gijsbertha pa 3 aña largu a indiká ku APC tabata kandidato prinsipal pa atkerí e bankonan PSB Bank i GiroBank i pone nan dos, huntu ku Centrale Hypotheekbank bou di un dak nobo ku ta APC Bank.

Entretantu APC Bank tin su lisensia i gobièrnu a transferí akshonnan di PSB Bank pa APC Bank, pero Banko Sentral di Kòrsou i St. Maarten resientemente den un karta konfidensial a indiká di a pone un paro na e proseso pa APC atkerí GiroBank tambe.

Huntu ku gobièrnu lo buska un otro solushon pa GiroBank. Pa hopi luna kaba sinembargo ta biba un temor bou di e trahadónan ku e úniko solushon lo ta ku ta pone un paro definitivo na operashon di GiroBank.