WILLEMSTAD.- Gobernadó sra. Lucille George-Wout a hiba su diskurso na okashon di Pasku 2024. El a trese dilanti komo Gobernador, e ta konsiderá ku su tarea mas importante ta defendé esnan di kende nan interes ta deskuidá òf ta na peliger di ta deskuidá. Denter di e posibilidatnan eksistente, e ta pidi atenshon pa e hendenan ku tin nesesidat di e kuido akí, i lo e sigui hasi esaki komo hefe di gobièrnu i komo organismo di Reino. Pero ta klaro ku esaki ta tarea di kada siudadano denter di komunidat tambe, independientemente di su fe òf su kreensia. Periodo di Pasku ta momentu ekselente pa hasi balansa i evaluá; Unda huntu ta awe i e kaminda ku ta kanando ta esun korekto? Pa a determiná e mensahe di Pasku di e añ’akí, gobernadó tira un bista tras riba e añ’akí ku ya ta tras di lomba, i pa no ripití loke el a papia mas bia’, el a lesa e mensahenan di Pasku di pasado. Hopi be el a mira tres detaye ta bini dilanti. Por ehèmpel yamamentu pa generá “konfiansa, libertat i responsabilidat”, pero tambe pa “nos ta alerta, mustra solidaridat i kordialidat” (den e añanan di coronavirus). Gobernadó a dirigí su mensahenan ku frekuensia na un grupo partikular di sosiedat ku tabata meresé atenshon spesial.
E aña akí gobernadó a bisa di no ta dirigiendo su mensahe di Pasku na un grupo en partikular, sino na tur hende, pasobra e mensahe ta universal, es desir, basá riba esun bíbliko: “fe, speransa i amor”. E mensahe akí no ta apropiá solamente pasobra ta selebrá Pasku huntu, sino tambe pasobra: fe, speransa i amor ta e tres balornan humano ku e ta deseá tur hende na abundansia.
Kere (o sea: tin fe): Tin fe i konfia den un poder superior, mantené fe den Reino i den komunidat di Kòrsou i tin konfiansa ku otro. “Boso tur … kada un di boso tin boso propio talento- i donnan ku ta nesesario pa hasi ku nos dushi Kòrsou ta floresé. Sigui kere den nan i usa e talentonan ei. Manera e atletanan karibeño a hasi durante e weganan Olímpiko di Verano na París e aña akí; ku aktuashonnan ku a logra resultadonan ekselente i inkluso un medaya di oro olímpiko! Frente kontratempu enorme tambe, e atletanan akí bon motivá a sigui kere den nan mes i esaki ku frekuensia a resultá den prestashonnan eksepshonal”.
E komunidat di fe na Kòrsou ta un totalidat kolorido di kua por ta orguyoso. Kere den dje i protehá e komunidat ei, pero ofresé tambe espasio pa karakterístikanan ku ta úniko (eigenheid). Rekonosé e forsa i talento, sigui traha na “bo” mes, inkluso ora kos no kana bon òf ora ta parse ku “bo” fe ta lagá “bo” na kaya.
Speransa: Pa sra. gobernadó speransa ta masha ligá na kompromiso, e gana di lucha pa algu i na optimismo. Ta di lamentá ku tin tantu foko di kandela den mundu. Ta preokupá su persona mashá tambe, e esenario polítiko internashonal i e kondishonnan geopolítiko skur. Komunidat di Kòrsou ta karakterisá tradishonalmente pa diversidat. Loke ta uni “nos” den e diversidat akí ta presisamente e mensahe bíbliko di speransa i e poder liberadó ku e ta manda. Apesar di e kontratempu nan, laga mira padilanti ku speransa. Esaki por ta resultá difísil, spesialmente ora tin pèrdida personal. Anto ta nèt e ora ei ta importante pa ta konektá ku otro. Personalmente, gobernadó tin speransa den e kosecha riku di studiantenan ku, durante selebrashon di 70 aña di Statüt di Reino Hulandes, a mustra kon nan ta mira ku balentia nan futuro na Kòrsou i denter di Reino. En partikular, e kòmbersashonnan ku e tabatin ku e hóbennan di e skol Joseph Civilis di Barber a hasi impreshon riba dje, i a dun’é speransa. E hóbennan akí ta trahando duru pa konstruí un mihó futuro, no pa nan so, sino tambe pa “nos” Kòrsou stimá. Stima: Promé di Korintionan 13:13 ta bisa – “Esakinan ta keda: fe, speransa i amor, e tresnan akí, pero e prinsipal di nan ta amor.” Den tur e bunita kòmbersashonnan, pashoná i tin bia emoshonante ku tabatin ku hopi di “boso” den e añanan ku a pasa, durante su kantidat di resepshon i bishitanan di trabou, loke mas a yama su atenshon ta e entusiasmo i e pashon di yunan di e tera. Komo Gobernador, semper el a laga su amor pa Kòrsou i Kòrsou su yunan gui’e den tur su palabra- i akshonnan. Interes di e siudadano di Kòrsou ta fundamental den su trabou. “Mi ke mira Kòrsou komo un lugá, kaminda tur hende por sinti nan na kas, liber i stimá. Na 1955 tempu ku a invitá e poeta Van Duinkerken pa e bin Kòrsou i e otro islanan di e Antia Hulandes di e tempu ei, pa duna un seri di lektura komo parti di un mishon amplio pa kontribuí na e konekshonnan denter di Reino, el a publiká un poema den kua e ta duna kontesta riba e pregunta: “Kiko bo ta haña mas bunita di Kòrsou?” El a kontestá: ‘… Pero mas profundamente na Kòrsou, loke mas ta yama mi atenshon ta e lenga, e andá, e risa, E mirada kasual di kada hòmber i di kada muhé. Anto ami lo ke añadí: di kada mucha, di kada hóben”.