Kredo;Kai lanta i sigui mas importante ku nunka

WILLE,STAD.-Awe mainta a tuma lugá e seremonia den kuadro di apertura di aña parlamentario 2020/2021. Na e okashon aki su ekselensia gobernador Lucille George-Wout a bisa ku e kredo di aña pasá, ‘Kai, lanta i sigui’ awor mas ku nunka ta keda importante i vigente.

E kabesante di gobièrnu a bisa ku Kòrsou, lamentablemente meskos ku hinter mundu, a keda konfrontá ku Covid-19. Nos komunidat a logra tene e pandemia aki basta bon bou i kontròl. Covid a resultá di ta mas ku solamente un krísis di salubridat, pero tambe un krísis di humanidat. Mas ku nunka e kredo ariba menshoná ta mas nesesario ku nunka. E kresementu di kontagio lo tin reperkushon pa  ekonomia lokal tambe.

Pa logra rekuperashon duradero, Kòrsou tin mester di sosten. Ulanda a yuda i a ofresé pa sigui yuda pero bou di kondishon. Un di e kondishonnan aki ta institushon di un entidat di reforma di Karibe (CHE) i tambe e asina yama ‘landspakket’ ku ta kontené reformanan struktural. Gobièrnu di Kòrsou a proponé rekuperashon i reforma. E áreanan di enfoke ta entre otro: Desaroyo ekonómiko duradero, sektor laboral dinámiko, finansa públiko sano, sektor públiko efisiente i efektivo, salubridat, fortalesé seguronan sosial i enseñansa di kalidat.

Mas aleu su ekselensia a bisa ku gobièrnu a supsidiá 17 mil salario di aprel pa yüni, tambe a duna sosten na 3 mil empresario. A duna alivio na 1600 hende ku a pèrdè trabou den e pandemia aki, a duna karchi sosial na esnan den mas nesesidat. A duna 2300 karchi na hende ku a pèrdè trabou i mas ku 7 mil hende ku ta kobradó di ònderstant. Mester stimulá sektornan ku mester krea kuponan di trabou èkstra pa yuda empresanan salu krese. Mas detaye den edishon di EXTRA.