WILLEMSTAD.- Awe mainta a tuma lugá apertura di aña parlamentario 2018-2019. Manera ta e kustumber su ekselensia gobernador di Kòrsou, sra. Lucille George-Wout a pronunsiá e deklarashon di e gobièrnu pa e periodo menshoná.

gobernador a indiká ku evaluando situashon finansiero gobièrnu a skohe pa wak su propio presupuesto, kon pa mengua e défisit. Na fin di 2017 a disidí na wanta algun gastu i na 2018 gobièrnu a presentá un presupuesto ku ta enserá ku ta minimalisá gastunan, ekonomisá riba vários puesto i a kuminsá ku akshonnan pa kobra plakanan ku tin riba kaya. Ku e akshonnan aki ta premirá ku ta sera e presupuesto di 2017 i ku lo rekobrá gran parti di e défisit di 2017.  Pero pa falta di kresementu ekonómiko atrobe entradanan di gobièrnu den 2018 a keda impaktá. P’esei gobièrnu ke rekonsiderá pa rekobrá e défisit di 2017 den añanan benidero pa duna espasio pa netamente hasi e invershonnan i reformanan nesesario, kual lo ta determinante pa un kambio di direkshon di e pais aki.

Gobernador a mustra ku Kòrsou a yega na un punto krusial, kaminda loke awor aki tin mas mester di dje ta invershon pa asina krea kuponan di trabou i duna sosten na e gruponan mas debil den nos komunidat. Pues banda di akshonnan kontinuo i a korto plaso gobièrnu ta komprometé pa hasi eskohonan fundamental, ku ta nesesario i no desishonnan djis pa tanten ni pa e próksimo 3 añanan so. Gobièrnu ke tuma desishonnan pa realisá riba término largu un futuro ku ta brinda mas perspektiva na tur siudadano i pa esei gobièrnu tin un plan amplio. Mas detaye den EXTRA su edishon.