WILLEMSTAD - Gobernador di Sint Maarten i Gobernador di Kòrsou, a base di Artíkulo 1 i Artíkulo 6 di “Uitleveringsbesluit van Aruba, Curaçao en Sint Maarten”, a ordená ekstradishon pa Estádos Unídos di:

Rogelio Koeiman (Aruba, 1968)

Gilbertico Felisia (Kòrsou, 1978)

Ramphis Rietwijk (Kòrsou, 1965)

Esaki konforme un petishon di ekstradishon di 29 di òktober 2013 di parti di Departamento di Hustisia di Merka. E sospechosonan a keda detené respektivamente dia 15 di novèmber 2016 i 17 di yanüari 2017.

E desishon di ekstradishon a keda firmá pa Gobernador di Sint Maarten i Kòrsou dia 16 di yanüari 2017. Tur tres sospechoso ta keda ekstraditá a base di un petishon di District Court Southern District of New York (Estádos Unídos), sospechá di dos transporte di droga di Sint Maarten pa Merka.

Parket di Prokuradó-general (PPG) a inisiá mientrastantu ku e proseso di ekstradishon pa Merka di e personanan en kuestion.