WILLEMSTAD.- Gobièrnu di Kòrsou a deklará djaweps mainta último un situashon di estado di emergensia. Manera ta konosí Lei di Emergensia (‘Landsverordening Uitzonderingstoestand’) a keda aprobá dor di Parlamento di Kòrsou dia 3 di desèmber. Ku esaki ta posibel pa gobièrnu por instalá un situashon di estado di emergensia. Esaki a tuma lugá dia 10 di desèmber for di oranan di mainta. Asina minister-presidente Eugene Rhuggenaath a bisa djaweps último durante konferensia di prensa di gobièrnu relashoná ku e último desaroyonan rondó di Covid-19 i Lei di estado di emergensia.
Segun Rhuggenaath e lei di emergensia ta duna Parlamento di Kòrsou oportunidat pa evaluá i reuní relashoná ku situashon di estado di emergensia. “Si parlamento ta sinti ku esaki no ta nesesario, nan por tuma un desishon riba esaki. Esei ta manera nos a splika resientemente kaba relashoná ku introdukshon di Lei di Emergensia.’’ Rhuggenaath a splika ku esaki ta forma parti di ‘henter e checks and balances’, e balansa den e lei, ku ta forma parti di e lei di Emergensia ku Kòrsou tin for di siman pasá.
Rhuggenaath durante konferensia di prensa a splika ku lei di emergensia, mihó konosí komo ‘Noodwet’, a kousá basta diskushon den nos komunidat. ‘’Lokual mi por bisa ta ku e Landsverordening Uitzonderingstoestand i e dekreto pa deklará un situashon di estado di emergensia, konforme e lei su artíkulo 2, esaki ta dirigí netamante na e pandemia di Covid-19. Teniendo kuenta ku e medidanan ku a wòrdu tuma te ainda a base di e leinan aktual ta efisiente i efektivo pa por kontrolá i sòru ku tin kumplimentu di regla.’’
Pa Rhuggenaath ta importante pa enfatisá ku e Landsbesluit Uitzonderingstoestand ta dirigí spesífikamente riba e pandemia global di Covid-19 ku a impaktá nos pais tambe. ‘’Mirando ku e sifranan ku ta bin eskalá, nos tin un situashon ku ta rekerí pa nos ta instalá medidanan i na mesun momento mantené e medidanan den nos pais. I pa nos ta trese e situashon bou di kontrol. Esaki ta e konsiderashon prinsipal pa dekretá e situashon aktual di un situashon di emergensia, konforme e lei pa nobenta dia.’’