WILLEMSTAD.- Den un karta ku resientemente AMAK a manda pa un alto funshonario di departamento di Impuesto, Minister di Finansa i tambe Minister di Kultura ‘DEN E BEMBE’ por a tuma nota ku AMAK a entregá un opheshon ‘bezwaar’ kontra dje desishon di Gobièrnu pa ninga nan petishon pa eksonerashon di pago di OB pa loke ta trata Festival di Tumba.
E motibu prinsipal dje ningamentu ta sinta den e echo ku Festival di Tumba konforme e lei di eksonerashon di pago di OB no ta kumpli ku e eksigensia di tin presentashon di artistanan internashonal di renombre na e festival.
Segun e karta di opheshon di AMAK e motibu menshoná ta e úniko motibu pa kua a ninga e petishon.
E motibunan pakiko a entregá un opheshon ta debí na e siguiente puntonan segun AMAK: Festival di Tumba tin un presupuesto di kasi 2 mion florin i ta e festival kultural di mas grandi i popular di Kòrsou ku durante di e simannan promé i durante di e siman di tumba tin un influensia grandi riba ekonomia di Kòrsou.
Otro punto ta e echo ku tur entrada generá durante di Festival di Tumba ta keda den e ekonomia di Kòrsou, un garantia pa spar divisa.
Pa AMAK e echo ku e lei ta preskribí ku ta obligá pa artistanan internashonal ku renombre internashonal partisipá na e festival ta entre otro un echo diskriminatorio kontra di nos músiko i artistanan lokal, ku pa loke ta trata kapasidat i talento no ta kai chikí kontra niun dje artistanan internashonal. Aserka ta bin ku e loke ku nan gana ku nan presentashon nan no ta gasta esaki lokalmente, pero den eksterior.
Ku e desishon aki Gobièrnu no ta duna kontenido na e desaroyo di patriotismo, e sentimentu di balor propio i ‘nation building’.
Festival di Tumba ta keda konsiderá segun AMAK komo un e evento mas popular i grandi di aña kaminda kasi 80% di nos komunidat ta direktamente embolbí i dje forma aki por keda konsiderá un dje katalisadónan di mas grandi di nos ekonomia. Durante dje siman di Festival di Tumba un gran parti di nos komunidat ta sea den Festival Center òf ta siguiendo e festival via di radio òf televishon.
Finalmente  AMAK ta pidi Gobièrnu pa rekonsiderá e desishon i pa duna e organisashon eksonerashon di pago di OB pa e añanan 2015, 2016, 2017 i 2018.