WILLEMSTAD.- Eerste Kamer na Hulanda djamars último a aprobá moshon ku Paul Rosenmöller di e partido GroenLinks a entregá pa duna alto prioridat na relashonnan den Reino den e gabinete nobo. Intenshon di e moshon ta ku dor di intensivá e esfuersonan di Hulanda riba tereno di seguridat i esun sosial ekonómiko e relashon ku e islanan mehorá di un forma duradero i konkreto. Djamars último Rosenmöller a haña sufisiente sosten for di otro partido pa su moshon. Frakshon di partido PVV (Partij voor de Vrijheid) di Geert Wilders a vota kontra su moshon.
EXTRA ayera a papia ku sr. Rosenmöller, ku tabata hopi kontentu ku Eerste Kamer a bai di akuerdo ku su moshon. Rosenmöller a splika ku el a entregá e moshon pa motibu ku, na su opinion, tin hopi kos ku por wòrdu drechá den nos relashonnan di Reino. E ta splika ku tin basta kos ku ta bayendo bon. ‘Pero den general relashonnan den nos reino entre Hulanda i e diferente islanan karibense por mehorá.’
Segun Rosenmöller ta importante ku den nos Reino nos ta fortalesé relashon riba tereno di seguridat, tereno di ekonomia sosial, tereno di ekonomia i di finansa.
Meta prinsipal di e moshon ta ku gobièrnu hulandes nobo tin ku duna mas prioridat na e tópiko di relashonnan di Reino. ‘Na e momentu aki nos tin un sekretario di estado ku ta traha hopi duru pa e relashon entre Hulanda i e paisnan Karibense. Pero hopi bia e no ta haña sosten for di su koleganan. Segun mi gabinete nobo tin ku duna prioridat na e tópiko komo gabinete kompleto.’ Segun Rosenmöller awor ta e momentu ku den proseso pa yega na un gabinete nobo, tin ku duna mas atenshon na e tópiko. Tin ku reuní i disidí kon e tópiko importante di nos Reino por haña mas atenshon, el a splika.
T’asina ku e siman pasa, ora Rosenmöller a entrega su moshon, Eerste Kamer a hiba debatenan ku e sekretario di estado demishonario sr. Raymond Knops enkargá ku Asuntunan Interior i Relashonnan den Reino. E debate tabata riba e relashon ku e paisnan i munisipionan den e parti Karibense di Reino Hulandes. Di akuerdo ku Rosenmöller, un ke otro a surgi na momentu ku sekretario di estado tambe a usa e palabranan ‘huntu’ i ‘forsanan konstruktivo’. Ku su moshon Rosenmöller ta spera ku e gabinete nobo realmente ta mara maneho konstruktivo na e palabranan nèchi.