WILLEMSTAD.- Gobièrnu di Kòrsou den e próksimo simannan mester presentá un òf mas kandidato pa bira miembro di e Kolegio di Supervishon Finansiero (Cft). E aktual miembro di Kòrsou, Alberto "Chos" Romero a  tuma su retiro. Romero a deklará resientemente ku despues di 9 aña den e tim speshal aki, ku a bira tempu pa e baha. Ademas e kier mas tempu pa su mes i su famia.

No ta masha kla ki proseso Gobièrnu di Kòrsou lo bai usa den e kaso aki. No ta usual por ehèmpel ku pa e tipo di puestonan aki ta pone un aviso den korant. Hopi biaha ta fula tera serka kandidatonan ku ta interesá i ta kumpli ku e kriterionan. A base di esei ta hasi un proposishon pa nombra e miembro. Di tur manera un di e kriterionan importante ta ku e persona tin un trayektoria amplio riba tereno finansiero-ekonómiko. Na Kòrsou tin masha hende ta kumpli ku e kriterio aki, tantu esnan ku penshun kaba komo algun spesialista hóben. E problema grandi ta ku ora bo ta miembro di un entidat asina bo ta suheto na publisidat i tin biaha krítika severo. Esei ta pone ku hopi biaha ta nombra hendenan ku tin un trayektoria kaba i a pasa den prosesonan kaminda nan por kontra e tipo di sirkunstansianan aki.

Un di e kandidatonan ku ta mas menshoná awor aki ta eks-minister José Jardim ku a hasi un bon trabou komo minister di finansa. El a logra huntu ku gobièrnu pa durante 4 aña koregí e káos finansiero ku e gobièrnu di 2010 pa 2012 a laga ku hasta a kondusí na un Aanwijzing. Banda di esei pa kuater aña konsekutivo gobièrnu di Kòrsou tin un presupuesto balansá ku pa gran parti ta trabou di e eks0minister. No tin informashon ku e mes ta interesá pa e funshon pero hopi ta konsiderá tantu den polítika komo pafó di polítika ku e ta un di e kandidatonan ku por hasi e trabou aki. Ademas a konosé e trabou di serka pa motibu di su kontaktonan estrecho ku e kolegio. Jardim tabata den publisidat resientemente pa motibu di dos nombramentu importante. El a bira sosio na e empresa di konsultent BearingPoint i despues a nombr'é presidente komisario di InselAir. No tin informashon si e dos posishonnan lo presentá un konflikto di interes pa su eventual miembresia di e kolegio.

E kolegio lo ta próksimamente na Kòrsou atrobe presidí pa prof. dr. Age Bakker.