WILLEMSTAD.- Den un anunsio interno Gobièrnu di Kòrsou djaluna 21 di yüni a partisipá ku dia 25 di yüni lo paga parti di sèn di vakashon (1/12) manera primintí. E pago ta sosedé huntu ku e salario mensual. Esaki ta nifiká ku ámtenarnan lo haña 1/12 parti di e sèn di vakashon ku nan ta haña normal huntu ku nan salario. Por ehèmpel si un ámtenar tin un salario di 3000 Naf mensual; 1/12 parti ta 250 Naf.
Den e anunsio interno gobièrnu ta bisa ku riba e slep di salario lo por tuma nota di un frase apart ku e teksto ‘uitbetaalde vakantiegeld’. Pa loke ta e parti di impuesto, lo usa e tarifa speshal pa e parti di sèn di vakashon, manera ta kustumber ora ta paga sèn di vakashon kompletu.
Sindikato ABVO resientemente a duna di konosé ku e ta keda para tras di pago di parti di sèn di vakashon pa ámtenarnan. Miembro di direktiva di e sindikato George Hernandez a splika ku e fecha riba kual e areglo ta vense ta promé di yüli. Mirando ku e periodo riba kua ta kalkulá e montante, esta di mei pa mei, gobièrnu ta obligá na paga esaki konforme su propio leinan promé ku 1e di yüli.
George Hernandez ayera den deklarashon na EXTRA: ‘Nos a pidi minister di Gobernashon, Planifikashon i Servisio Públiko (BPD) pa paga e sèn di vakashon separá. Pasobra si bo ta paga esaki konhuntamente ku e salario hende por kai den un tarifa spesial (‘bijzonder tarief’) di impuesto. Konsekuentemente hende ta haña ménos sèn.’
Hernandez ta lamentá ku gobièrnu ta paga e parti di sèn di vakashon huntu ku e salario. ‘Nos a kuminsá papia ku gobièrnu i nos a pidi pa hasi esaki separá. Pero tòg nan a hasi e kos na nan manera.’ Hernandez: ‘Nos lo tuma kontakto di nobo ku minister di BPD. Pero mirando ku nan a drai e slep di salario kaba ta bira difísil pa nos por para esaki i drai bèk.’ Na su opinion ABVO no por hasi mashá kos mas.
Banda di esei Hernandez ta splika ku gobièrnu lo no paga mas ku 1/12 parti di sèn di vakashon, esaki nan tin ku paga segun lei, Hernandez ta splika.
E desishon pa paga e 1/12 parti di sèn di vakashon a keda tumá durante reunion di Konseho di Minister di gabinete-Rhuggenaath, eks-minister di BPD Armin Konket a konfirmá EXTRA.