WILLEMSTAD. -Parlamentario hulandes pa partido D66 Salami Belhaj dia 17 di yüni a manda pregunta na minister di Defensa hulandes Ank Bijleveld tokante eks-plantashi Wacawa na Bándabou, Kòrsou. Pa basta aña Defensa ta hasi uso di e tereno pa hasi práktika di tiramentu. Resientemente organisashon periódiko hulandes ‘Follow the Money’ a skirbi ku Defensa hulandes no tin pèrmit pa hasi konstrukshon ni pa e training di tiramentu riba e tereno. Parlamentario Belhaj a puntra minister Bijleveld si e ta na altura di e artíkulo. Tambe e ta puntra si Defensa hulandes tabata na altura ku un ‘aanlegvergunning’ ta obligatorio.
Sekretario di estado hulandes Barbara Visser (Defensa) dia 16 di yüli a skirbi Belhaj ku gobièrnu no por duna kontesta te ainda. Despues di periodo di ‘zomerreces’ (e periodo sin reunion den parlamento hulandes) gobièrnu lo duna kontesta, Visser ta skirbi. E periodo di zomerreces ta entre 9 di yüli i 6 di sèptèmber.