WILLEMSTAD.- Gobièrnu di Kòrsou tin konfiansa den e pasonan ku a tuma huntu ku Insel Air pa restrukturá e kompania i salbaguardiá e konektividat di Kòrsou. Esaki gobièrnu ta trese dilanti mirando e desaroyonan di último dianan. Debí na e echo ku Konsulado General Merikano na  Kòrsou a  duna un prohibishon na su personal pa bula ku InselAir, Gobièrnu Ulandes a disidí awe 2 di febrüari 2017 pa no laga su trahadónan bula ku Insel Air.

Minister di Tráfiko Transporte i Planifikashon Urbano (VVRP), sra. Suzy Camelia –Römer a tene atrobe kontakto ku sekretario di estado di asuntunan di aviashon sra. Sharon Dijksma. Den kombersashon a mustra Gobièrnu Ulandes riba e echo ku anteriormente a ofresé Gobièrnu di Merka i gobièrnu Ulandes, pa motibu di transparensia, pa nan laga nan inspektornan di aviashon inspektá seguridat di avionnan di Inselair Kòrsou.

Minister atrobe a mustra riba e echo ku Gobièrnu di Kòrsou i Outoridat di Aviashon Sivil di Kòrsou (CCAA) no ta laga avion bula si no konsiderá nan sigur. E maneho di CCAA ta ”Safety First”.

Pa Gobièrnu di Kòrsou bida di hende ta sagrado i no ta kos pa hasi wega kuné.

Ademas ta bon menshoná ku banda di e echo ku a insentivá e inspekshon for di aña pasa ougùstùs dor di kòntròl mas frekuente, CCAA a aserká 5 kompania eksperto di aviashon - 4 Merikano i 1 Kanades-  pa duna un oferta pa hasi un kontrol profundo i independiente di Insel Air.

Minister a referí Gobièrnu Ulandes pa informashon tokante di e avionnan di “ground” pa Aruba, na Civil Aviation Authority di Aruba. Minister a mustra tambe riba e echo ku e avionnan aki, ku Aruba ta inspektando, no ta bulando i por konsekuensia no por papia di un situashon di inseguridat. Ta responsabilidat di Aruba pa atendé ku e inspekshon aki.

For di 30 di yanüari 2017 e rutanan ku e avionnan di Aruba tabata bula, ta keda ehekutá pa diferente kompania di charter aprobá pa CCAA.

Aviashon ta dinámiko i di e flete di 3 avion Fokker ku ta registrá na Kòrsou, Insel Air Kòrsou na e momentu aki a tene unu na tera pa un revishon. Mester bisa ku dia 4 febrüari próksimo un di e avionnan ta di skèdule pa un chekeo regular, i e di tres avion ta normal ta den servisio.

Gobièrnu tin konfiansa ku huntu ku Insel Air lo restrukturá e kompania i asina salbaguardiá konekshon for di Kòrsou.