WILLEMSTAD.- Awe, mañan i djabièrnè próksimo ta bai tin un Asamblea Nashonal Bibando. Asina minister-presidente Eugene Rhuggenaath a splika djasabra último. Rhuggenaath: ‘Lo invitá diferente gruponan di enfoke i interes pa forma parti di un kombersashon, un diálogo pa krea perspektivanan nobo. Un perspektiva sin ku mester tuma medida mas den futuro.’
Organisashon di e Asamblea Nashonal ta bai man na man ku e suavisashon nobo. Un di e suavisashon importante ta ku gobièrnu lo eliminá Plachi di Dia mañan. Tambe gobièrnu a duna di konosé ku entrante 11 di mei tur trabou di konstrukshon por kontinuá, tur gimnasio, i skol di ‘crossfit’ por habri atrobe i fishinan ku tin kontakto ku kliente por bolbe risibí kliente.
Segun Rhuggenaath intenshon di Asamblea ta ku tur gruponan di interes, ku semper ta keda afektá dor di e medidanan, por skohe pa bini durante e dianan aki ku inisiativanan konkreto. Rhuggenaath ke tende ideanan ‘kon Kòrsou por sigui funshoná komo pueblo mei mei di e pandemia di COVID-19 sin nos mester yega asina leu ku nos tin ku bai tuma medida atrobe den futuro.’ Esei ta e meta komun di e Asamblea ku ta kuminsá awe.
Rhuggenaath a splika ku gobièrnu a invitá representante di sektor di turismo, horeca i hospitalidat, edukashon i famia, religion, deporte i fishinan ku ta bin den kontakto direktamente ku kliente i mundu empresarial. Representante di tur e grupo lo partisipá na un Asamblea Nashonal Bibando. ‘A aserká tur e gruponan pa asina krea un balansa den e manera kon nos por sigui. P’esei mes e ta yama un Asamblea Nashonal kaminda gobièrnu, ekspertonan i gruponan di interes konhuntamente por yega pa krea un perspektiva kaminda nos ta bai biba un bida mas normal atrobe. Sin ku kada bia mester bai bèk i tuma medida, bai den lockdown, etc.’
Segun Rhuggenaath esaki – ‘por ehèmpel’ - ta sumamente importante pa e sektor turístiko. ‘E sektor ke por planifiká i promové Kòrsou komo un destinashon seif.’