WILLEMSTAD.- Gobièrnu ta hasiendo su esfuerso pa Fundashon Wega di Number Kòrsou (FWNK) i Fundashon Landsloterij Kòrsou (SCL) por bira un entidat pero na su sistema, esei di akuerdo ku un ehersisio ku gobièrnu ta entamando pa yega na fushon di e dos fundashonnan. Pero e konsehero SBTNO tin su interogantenan riba sierto puntonan, i asta por bisa ku e ta desrekomendá pa hasi esakinan. I no opstante e opheshonnan di parti di SBTNO, gobièrnu a disidí ku e lo sigui e proseso manera el a deskribí i nombra e hendenan ku e ke i kaminda ku e ke.

T’asina ku e proseso aki ta unu ku a start algun tempu pasá i a kuminsá haña forma aña pasa na luna di sèptèmber. Gobièrnu di Kòrsou a tuma un desishon al respekto dia 20 di yanüari 2021 i a pidi konseho di SBTNO riba no solamente e fushon, sino tambe e diferente profilnan ku lo mester tin pa por nombra miembronan di e hunta di komisario.

Den su konseho SBTNO ta tòg un tiki krítiko pa ku e manera kon gobièrnu a bin ta anda ku e asuntu aki. Por ehèmpel, SBTNO ta bisa ku el a pidi mas informashon respekto e motivashon pa fushon di e dos entidatnan, pero ku e no a risibí esaki. Es mas, no tin ni un dokumento di maneho ku ta mustra riba e nesesidat di un fushon, i tampoko ta duna un bista di e implikashonnan finansiero ku esaki lo ta trese kuné.

Mas aleu e minister ta referí na un moshon di Parlamento for di 2013 ku tin di aber ku outomatisashon i optimalisashon di FWNK pa asina garantisá entradanan pa gobièrnu. Den kuadro di esaki e minister a duna di konosé ku gobièrnu ta en buska di un plataforma digital pa asina tur benta di number por tuma lugá atraves di e plataforma ei. E fundashon di gobièrnu aki lo keda enkargá ku e loterianan aktual i koriente (bièchi i wega di number), pero tambe lo por agregá Lotto. Segun gobièrnu esaki a kuadra ku e prinsipio di sinergia.

Loke SBTNO tin hopi problema kuné tambe ta sierto nombramentunan ku gobièrnu kier pasa kontra su rekomendashon.

Mas aleu SBTNO ta remarká ku tampoko el a risibí un plan di maneho pa e organisashon nobo, tampoko tin un konseho di e Ministerio di Finansa ku tin di aber ku e implikashonnan finansiero. Es mas, tampoko por mira den e dokumentonan ku FWNK lo ta di akuerdo ku e intenshonnan di gobièrnu. Segun SBTNO e no por sigui e motivashon breve ku minister a duna pa fushon di e dos fundashonnan. Minister ta bisa ku lo tin un moshon di Staten pa optimalisá i outomatisá FWNK, pero pa por logra esei no ta nesesario pa hasi un fushon. Ta trata aki di un proseso organisatorio interno ku lo por a entamá kaba denter di FWNK.

Segun e konsehero, teniendo kuenta e motivashon breve ku minister a duna riba fushon di e dos fundashon aki, e tin motibu pa tin opheshon di peso kontra  e ehersisio ei, esta fushon di FWNK i SCL.

No opstante e opheshonnan di SBTNO, gobièrnu a disidí ku e nombramentunan lo tuma lugá manera el a fiha, i solamente ta bisa ku e minister lo tin di duna su motivashonnan por eskrito na e konsehero. Lo nombra un sierto persona den e funshon di direktor interino pa un periodo di seis luna. Nombramentunan den e komisariado nobo tambe lo bai segun deseo di gobièrnu.