WILLEMSTAD.- Gobièrnu di Kòrsou ta desidido pa tuma bèk e tereno kaminda ántes tabatin Little League Ballbark na Muizenberg. Pa vários aña kaba e tereno ta den man di Andruw Jones, kende ker a konstruí un parke di beisbòl.

Minister Van Heydoorn ayera tabata kategóriko relashoná ku e fasilidat aki. “Si Andruw Jones no ke sigui kuné, gobièrnu si ke hasi algu na e sitio”, segun e mandatario a trese dilanti. E mandatario ta konvensí ku mester konstruí un bon ballpark na e sitio i e ke mira esei keda realisá promé ku e aktual gobièrnu bai, manera el a trese dilanti.

Pues ta e intenshon pa buska pa tende di Andruw si ainda e ke realisá su proyekto i si esei no ta e kaso, e tereno tin ku bai bèk pa gobièrnu.