Awe mas ámtenar dunando sosten na akshon sindikal

WILLEMSTAD.-Un grupo mas grandi di ámtenar ta presente awe na sede di ABVO. Sindikatonan ku ta representá trahadónan den sektor públiko i semi públiko a hasi apelashon na trahadónan pa nan tei for di 7’or di mainta. Kenneth Bremer, miembro di direktiva di ABVO, a bisa ku tur e tempu gobièrnu tabata pidi ámtenar pa sea solidario ku komunidat i kòrta 12.5% miéntras ku djaya banda polítikonan si ta ‘hinka brasa den hende su kurpa’. Despues ku ayera a bira konosí ku minister i parlamentarionan a drecha nan salario esaki a kousa un reakshon  grandi speshalmente serka ámtenarnan.

George Hernandez (ABVO) a kòrda su kompañeronan ku ayera el a anunsiá ku ministernan si a subi nan salario. Na opinion di Hernandez, minister Konket por bisa ku ta trata di un korekshon pero echo ta ku a subi nan salario. Ministernan por bisa kiko ku nan ke, pero e realidat ta ku nan si a subi nan salario, miéntras ku e ámtenar si ta bai atras. Ministernan a sali di salario di 16 mil i a bai pa salario di 18 mil pa luna. E penshun di minister a subi, e penshun di e ámtenar si no ta subi pasobra no a subi su loontrede ni indexering. E ministernan mester duna ehèmpel.

Gobièrnu  a pidi ámtenar pa ta solidario anto awe si ta bin bisa ku ta ámtenar a pidi korekshon. Dikon ministernan no a bisa ku nan no ke korekshon? E ámtenar ta for di 2013 tabata e último aña ku el a haña indexering.

Sr. Juliana di NAPB a bisa ku den kuerpo polisial tin hende ku ta na skal 1 pa kuater aña kaba. A atendé minister pero te awe esei no a sosodé. E bon ámtenar ku a koregí fout di minister e mester bai koregí e fout di e trahadónan di kuerpo polisial.  Dikon e ministernan no a gradisí i ninga e korekshon pasobra ora e ministernan baha nan si ta sigui gosa dje benefisionan.

Toti Chirino di Straf a bisa ku e penshun di ministernan si ta subi i nan plaka di vakashon ta subi i tur otro benefisio ku e oumentu di salario ku konseho di minister a aprobá. E sindikalista a lamentá ku a trese informashon pa nan miembronan i tòg tin hopi ámtenar ku no a haña e ruta pa sede di ABVO.(file foto)