WILLEMSTAD.- Informashonnan insistente ku a yega na redakshon di EXTRA ta indiká ku Minister di Hustisia tin pensa di hala tur pèrmit di arma di kandela aden. Segun nos fuente t’asina ku Minister di Hustisia ke introdusí un maneho nobo pa loke ta trata otorgamentu di pèrmit.

Extra a komprondé ku tin hopi hende (komersiante) ku tin e pèrmit pa karga armá di kandela preokupá, pa motibu ku konforme e informashon nan, lo hala tur pèrmit aden i despues lo wak ken lo por haña pèrmit pa karga arma.

Remarkabel ta ku no tin muchu informashon riba e partikularidat aki, pero di un otro fuente EXTRA a komprondé ku ta trata di  pèrmitnan ku a keda otorgá den un forma dudoso. E pèrmitnan aki e minister ke hala aden.

Tin un proposishon riba mesa pa kambia e maneho di “zelfverdediging”. Pa logra e kambio, mester hala tur e pèrmitnan aden, pa despues atendé tur esnan ku tabatin un pèrmit di nobo i asina tur ku haña un pèrmit a pasa den henter e mulina pa haña un pèrmit.

Segun un otro fuente ta indiká ku e minister ta halando hopi desishon aden di Ministernan anterior. No ta konosí kua Minister, pa motibu ku den un korto tempu por bisa tabatin tres Minister. Despues di Minister Navarro, a sinta Minister Pisas i Minister Martina.

Segun e fuente tabatin hende ku a haña kabes di boto den e dunamentu di pèrmit pa arma di kandela, pero e preshon riba gobièrnu pa no introdusí e maneho nobo ta inmenso EXTRA a komprondé.

E maneho nobo lo mester a drenta na vigor for di 30 di òktober tras di lomba, pero a bin un suspenshon, asina e fuente a duna di konosé na EXTRA. Aparentemente tin un grupo grandi ku no ta kontentu ku e desaroyo aki, klaramente pa nan no mester pèrdè nan  pèrmit.

Segun e fuente esaki ta un di e motibunan ku ainda no a kuminsá ku e maneho nobo pa loke ta trata pèrmit pa arma di kandela. EXTRA a trata di drenta den kontakto ku Minister di Hustisia pa un reakshon  pero esei no a duna resultado deseá.