WILLEMSTAD. - Relashoná ku veredikto di Korte di Apelashon fechá 30 yanüari 2018, abitantenan di Rancho ta mal kontentu. Dor di e sentensia di Korte di Apelashon e abitantenan inhustamente ta wòrdu obligá pa kumpra nan tereno bèk ku gobièrnu a kita for di nan.

Banda di esaki gobièrnu lo basha 15 kas abou pa traha un kaminda prinsipal segun EOP, ku entretantu a bira opsoleto/antikuá.

Tur e kambionan aki lo kambia e bario drástiko di un bario trankil ku kas ku kurá amplio den un bario ku hopi kas pegá riba otro (kas di pueblo).

Otro punto ku e abitantenan ta mal kontentu kuné, ta di e echo ke e preis di tera ta hopi haltu. E preis haltu ta e konsekuensia ku Korte di Apelashon a dikta ku e abitantenan mes mester paga e infrastruktura di e bario.

Esaki no ta kuadra ku e lei ku ta preskribí ku konstrukshon di kaminda mester wòrdu pagá for di entrada di gobièrnu ku ta bini for di kobransa di belasting general i impuesto di karetera ku pagamentu di number di outo.

E pregunta di parti abitantenan ku ta surgi ta dikon e abitantenan di Wawoe ta wòrdu kastigá tambe ku e medida ku nan mester paga pa konstrukshon di kaminda ku ademas ta eksistí kaba.

Tambe e pregunta ta na Korte si esaki no ta kontra e prinsipio di igualdat.

Den otro barionan si ta gobièrnu mes ta paga pa konstruí kaminda.