WILLEMSTAD.- Den siman di 2 sèptèmber minister di Maneho di Gobernashon, Planifikashon Servisio Públiko (BPD), Ornelio ‘Kid’ Martina lo presentá den e Konseho di Minister ku e proposishon pa trese kambio den e lei pa kòrta ku 12,5 porshento den kondishon laboral di ámtenarnan. Ku e kambio aki ta eliminá e medidanan den e lei pa konhelá pago di indeksashon, “loontrede” i lumpsum.

Esaki minister Martina a partisipá na sindikatonan ABVO, Sitek, NAPB StrAF i SAP durante reunion di e órgano di konsulta GOA djaweps último. Punto di salida di gobièrnu ta keda ku ta eliminá e lei ku forsa retroaktivo te promé di yanüari 2024.

E sindikatonan ta di opinion ku mester bai bèk te promé di yanüari 2021 mirando e oumento drástiko di kosto di bida último añanan. Martina ta bisa ku direktorado di legislashon i asuntunan hurídiko ta kla ku e proposishon di lei i ta wardando ainda riba kalkulashonnan di Ministerio di Finansa pa añadí esaki den e paragraf finansiero di e lei.

Unabes ku Konseho di Minister bai di akuerdo ku e proposishon di lei e minister lo manda un “inzetbrief” pa GOA i asina yama un reunion, ekstraordinario si mester, pa atendé esaki ku sindikatonan, Martina ta sigui splika. Presidente di ABVO, George Hernandez ta bisa den un reakshon kòrtiku ku ABVO ta warda ku ansiedat pa e siman di 2 sèptèmber yega i e minister presentá den GOA ku e proposishon di lei inkluso tur kalkulashon.

Tambe e ta pidi tur miembro pa keda pendiente pa risibí mas informashon di nan sindikato. Hernandez ta satisfecho ku e echo ku porfin tin un fecha ku por presentá ku e kambio di lei i ta spera ku pronto empleadonan públiko por kobra nan indeksashon, “loontrede” i lumpsum di añanan 2023 i 2024.

Tambe Hernandez ta spera ku sindikato i gobièrnunan ta keda den negosiashon pa pago di e kondishonnan laboral aki riba añanan 2021 i 2022 tambe. E lei pa kòrta ku 12,5 porshento den kondishon laboral di empleadonan públiko tabata kondishon di Hulanda pa duna Kòrsou sosten di likides durante pandemia di Corona.

Banda di a konhelá pago di indeksashon, “loontrede” i lumpsum a kita algun dia di fakansi i para pago di plaka di fakansi tambe pa tur ámtenar. Na 2022 sinembargo a duna ámtenarnan pago di plaka di fakansi i dianan di fakansi bèk.

Mas di e puntonan ku sindikatonan a pasa den dje durante e reunion di djaweps tabata ta kambio di e lei di penshun pa hasi posibel ku penshonadonan por haña indeksashon di nan penshun sin ku ta mara esaki na e kondishon ku ámtenarnan tambe mester tin derechi riba indeksashon di salario. Alabes e sindikatonan ke tende ki dia minister di Finansa ta presentá den GOA pa duna informashon riba realisashon di e organisashon nobo di servisio di impuesto (Nieuwe Belastingdienst).

Riba e proseso di solisitut den kuerpo polisial e sindikatonan ke tende ki dia minister di Hustisia, Shalten Hato lo duna un presentashon den reunion di GOA. E sindikatonan ke sa mas aleu ki dia ta risibí e dokumentonan relevante relashoná ku un areglo pa ora un ámtenar kumpli 45 aña den servisio, kon ta pará ku e proposishon pa subi plaka di fakansi di 6 pa 8 porshento i maneho di gobièrnu den kaso di aksidentenan bou di ora di trabou.

Riba e preguntanan aki minister Martina a indiká ku nan no ta kla pa tratamentu ainda den GOA.

Foto:

...Ornelio ‘Kid’ Martina...