MAN-PIN:

WILLEMSTAD.- Partido MAN-PIN ta hasi un yamada urgente na gobièrnu i minister Charles Cooper komo vise promé minister, pa sinta na mesa ku sindikatonan ku meta pa yega na un solushon pa e loke e ámtenarnan i penshonadonan ta demandá. E partido a tuma nota di último desaroyonan rondó di e situashon entre gobièrnu i sindikatonan ku ta representá empleadonan públiko i a komprendé for di posishon i ekspreshonnan hasí pa minister Cooper durante su konferensia di prensa, ku e tin pleno sosten di promé minister Gilmar ‘Pik’ Pisas ku aktualmente ta den eksterior.

“Pueblo kompleto a spera un konferensia di prensa pa trese trankilidat i e disponibilidat pa yega na solushon. Esaki klaramente no tabata e kaso. Al kontrario, e posishon di provokashon a hasi e situashon mas tenso”, e partido ta indiká.

Pa tal motibu MAN-PIN ta hasi un yamada urgente riba minister Cooper, tumando na konsiderashon su eksperensia den polítika i gobernashon, pa den su kalidat di minister enkargá ku Asuntunan General, sinta na mesa ku e sindikatonan pa asina salbaguardiá interes general di pais i evitá un posibel wèlga general den sektor públiko.

“Un akshon general den sektor públiko i den enseñansa lo tin un impakto drástiko riba pueblo kompleto, den kua skolnan lo ta será, aparato di gobièrnu lo no duna servisio na pueblo loke tin efekto negativo pa pais. Partidonan na mesa den diálogo i negosiashon, respetando e derechonan fundamental komo meta pa yega na konsenso, ta loke pa MAN-PIN mester ta e punto di salida. Den situashon di krísis mester mustra madures pa por sali for di kualke konflikto.”

MAN-PIN ta hasi un apelashon riba Gobièrnu i vise promé minister Cooper, pa den esfera positivo i rèspèt mutuo sinta na mesa ku sindikatonan i yega na un solushon na interes general. “Representashon sindikal ta un parti importante di demokrasia ku meresé rèspèt i espasio pa vosiferá i defendé interes di nan miembronan komo parti di e pueblo trahadó.”
“

Foto:

...Lider polítiko di MAN-PIN, Giselle Mc William...