WILLEMSTAD.- Gobièrnu tin un responsabilidat pa garantisá pa e yu di Kòrsou ku aktitut korekto haña trabou. Den e kuadro aki no por t’asina ku ta duná pèrmit pa trese trahadó for di eksterior bin traha na Kòrsou sin ku ta duna un splikashon riba motibunan dikon ta hasi esaki.

Asina kolaboradó di frakshon di MAN den parlamento, Eugene Cleopa ta remarká. E ta kuestioná ku ta dunando pèrmit pa trahadónan estranhero ku un fasilidat mashá notabel.

Cleopa ta referí na reakshon di minister enkargá ku asuntunan di labor, Ruthmilda Larmonie-Cecilia relashoná ku e tópiko di dunamentu di pèrmit na grupo di trahadó estranhero a bisa ku ta awor e ta bai puntra di kiko ta andando eksaktamente. “Mi tin informashon ku minister ta na haltura ku a duna pèrmit pa 40 estranhero bin traha na Kòrsou, pues no mester krea e impreshon ku gobièrnu no ta na haltura ku a duna pèrmit pa kita pan for di yunan di Kòrsou ku ke traha”, Cleopa ta bisa.

Na su opinion prioridat di gobièrnu mester ta serka e trahadó lokal ku por a spera for di ayera mainta un splikashon di e minister. “Riba papel e struktura ta parse transparente, pero den práktika kosnan ta otro, anto den e kaso aki ta gabinete Pisas II mester protehá kuponan di trabou pa nos hendenan.”

Mas aleu Cleopa ta bisa ku sektor di turismo ta kresiendo na Kòrsou, pero ku e trahadó no ta sinti esaki den su saku. “Pero na islanan BES por ehèmpel por tuma nota ku ta subi suèldu mínimo i otro pagonan den kuadro di seguridat sosial.”

Tambe e kolaboradó di frakshon ta bisa ku trahadónan den sektor turístiko ta traha bou di spantu. “Nos ta risibí bastante reklamo di trahadónan lokal ku tin e aktitut korekto pa traha i duna un kontribushon na nan doño di trabou i ekonomia lokal ku ta bastante restrikshon tin pa nan por bin na remarke pa un trabou i ku nan ta risibí un otro trato kompará ku un trahadó estranhero.”

Cleopa ta mustra asta kon den pasado a laga grupo di trahadó estranhero drenta bou un areglo “spesial” djis pa fasilitá durante apertura di un hotèl, pero ku ta hañando informashon di trahadónan ku te ainda e trahadónan estranhero aki ta na Kòrsou. Ta p’esei e ke sa ta kon gobièrnu ta splika  ku ta ta laga mas trahadó di eksterior drenta.

“Ta asina simpel ta habri porta i laga trahadó estranhero drenta miéntras ku nos turismo ta sigui krese? Esaki miéntras ku e trahadó lokal mester keda sinta bou di palu den un situashon finansiero ku dia pa dia ta bira mas fèrfelu te ku e ta na punto di pidi limosna?”