Stanley ignacio

WILLEMSTAD.- E video ku e siman aki EXTRA a publiká riba su plataforma digital i den korant, relashoná ku un kachó ku outo ta dal i su kompañero ku no kier a bandon’é, a toka hopi di nos su kurason. Pero kon e relashon aki ta ku bestia. Hopi bia nos ta kere ku ta bestia ta nan i no tin sentimentu pero e video a demostrá otro.

E hòmber di mundu di animal Stanley Ignacio a bisa ku aki por mira simplemente kiko ta sentimentu. Hopi bia Stanley a yega di bisa ku si bo ta na kas ku bo kasá i yunan, bo ta papia ku bo yu, e yu ta pidi algu i bo ta bisa awor no por i bo ta sali bai, bo kachó ta den porta i bo ta ‘shiw’ e kachó hal’e un banda. Ora bo bin bek e kachó ta ku rabu ta waya ta spera bu i paden bo yu ku bo a nenga algu ta wak bo ku kara rabia. Esaki segun Stanley ta e sentimentu di bestia.

Ta algun bia Stanley a eksperensiá e tipo di situashonnan di bestia riba kaya i un di e biahanan asta ku aglomerashon di polis, brantwer pasobra e kachó drumí banda di esun ku a muri no tabata laga niun hende yega serka. Esei ta motibu ku ora e bestianan aki sali for di kas nan ta sinti nan mes ku sentimentunan di kulpa ku otro si nan no por bai kas huntu bèk. Esei ta motibu ku nan ta keda huntu pensando ku esun drumí abou ta lanta pa nan bai kas, pasobra ta huntu nan a sali for di kas, kisas a sali asta sin doño sa.

E situashonnan aki ta bin serka kachónan hopi bon ku otro. Por ta kachónan den un biba, ta nan dos ta na kas, doñonan tei i semper e kachónan ta huntu. Nan ta mara nan mes na otro i den e kaso aki un ta sali i e otro tambe ta bai su tras i e konsekuensia manera e biaha aki ku outo ta dal un di nan.

E kachó ku a keda atras ta keda ku trouma i e famianan no mira esaki. E lo keda kana i yora te ora e konvensé su mes ku su kompañero no tei mas. Tin bia nan komportashon na kas por bira algu fèrfelu pa e doñonan mes i nan por bira asta agresivo pasobra nan ta nan so.

Stanley ta kere ku ta bon e doño buska un kompañero mas lihé posibel pa esun ku a keda atras.

E tipo di sentimentunan aki bo ta haña serka pushi tambe, tin sierto para tambe ku si nan ta pareha ku otro i bo kita esun pa bai par ku otro, si e pareha tende e otro ta grita un kaminda, e no ta par ku esun para ku a pone pe.

Hopi hende ke sa den aksidente riba kaya, outo ta dal kachó òf pushi, kiko tin di hasi, ken tin di yama.

Stanley a splika ku den e kaso asina, ora haña e tipo di aksidentenan aki, humanamente mester yuda e animal. Un kachó por krusa kaya tin paga tinu. I aktualmente tin plaga di kachó ta kana los i un ta krusa kaya tras di otro. Humanamente esun ku a dal e kachó ta bon pa para, hala e bestia un kantu i si e bestia keda bibu e por ta agresivo i ta bon pa kue tras di su nèk i hal’é un kantu. No tene na su pia i otro kaminda pasobra e ta morde. E por morde pasobra e tin doló. Of buska yudansa pa e animal.

Lamentablemente no tin niun instansia ku por yama. Hopi biaha ta Stanley mes hopi hende ta yama. Antes tabatin Dierenbescherming ku tabata saka un hende pero tur hende sa nan situashon. Tin otro organisashonnan ku ta haña fondo pero no ta sali defendé e kachónan aki. Pero Stanley ta kere ku gobièrnu tin di tuma medida.

Dierenbescherming a konta 6400 kachó ta kana riba kaya. Ta hopi kachó i riba kaya ta kachónan ku ta ‘zwerf’, ku ta morde mucha i turista i tur siman ta haña nan raportá. Tin e Hit team di polis pero mayoria biaha ora tin kaso e polisnan a keda pone den otro departamento. Mester tin un tim spesial pa bestia, pa salbaguardiá e situashon na Kòrsou, sigur pa loke ta trata e kachónan ku ta kana riba kaya.

Si un hende mester mira un kachó riba kaya i outo a dal’é, mester buska manera pa hal’e kantu pa hende atendé. Si e bestia muri mester yama Selikor mesora. Si yama Stanley Ignacio e tin bon kontakto ku esnan ku ta rekohé animalnan morto riba kaya pa asina nan por bai kue mesora.

Ta kumbiniente pa nan por haña e bestia ei fresku ainda ya ku el a kaba di muri i no ora el a putri kaba.

Stanley por alkansá na 560-3653.