WILLEMSTAD.- Gobièrnu di MFK i PNP a kai. E desishon pa partidonan bai for di otro a kai awe mainta. Asina fuentenan verídiko ta konfirmá pa EXTRA. Informashon mas aleu ta indiká sinembargo ku ya kaba partido MFK tin kontakto ku partido KEM i miembro independiente di parlamento, Zita Jesus-Leito pa leim e koalishon i huntu forma un mayoria nobo di 11 den parlamento.

Lider polítiko, Ruthmilda Larmonie-Cecilia a haña un karta di partner di koalishon MFK awe mainta den kua ta partisipá ku MFK no ta dispuesto pa sigui den koalishon ku PNP inkluso parlamentarionan Sheldry Osepa i Gwendell Mercelina. Esaki lo tabata motibu pa Larmonie-Cecilia a yega na e konklushon awe ku PNP lo no por sigui partisipá den gobièrnu.

E karta ta prosedente di frakshon di MFK den parlamento ku a indiká ku nan no ta dispuesto di kontinuá den e koalishon ku parlamentarionan Sheldry Osepa i Gwendell Mercelina den e frakshon di PNP. E karta a bai pa lider polítiko di MFK, Gilmar ‘Pik’ Pisas ku ta alabes promé minister i ku na su turno a duna Larmonie-Cecilia e karta.

Larmonie-Cecilia a sali for di reunion di Konseho di Minister awe mainta i no ta alkansabel na e momentonan aki. E matrimonio entre PNP i MFK a yega pues di e forma aki na un fin.

Esaki despues di un reunion di Komishon Sentral di parlamento tumultuoso ku a tuma lugá djaluna último riba e desishon di minister di Finansa Javier Silvania (MFK) pa na yanüari 2023 duna eksonerashon na debe di impuesto pa 3 miar florin. Parlamentarionan di PNP,  Osepa i  Mercelina tabata krítiko den nan preguntanan pa minister Slivania durante e reunion.

Entre otro pa haña klaridat riba base legal pa e desishon di e minister i tambe veredikto di Korte di Apelashon ku a bisa ku e minister pa medio di un informe riba ret sosial defakto a duna eksonerashon na tur debe di impuesto di 2017 i promé sin tene kuenta ku niun kriterio