WILLEMSTAD.- E siman aki Minister di Tráfiko, Transporte i Planifikashon Urbano, sra. Zita Jesus-Leito, a duna kontesta na parlamentario sr. Eugene Cleopa riba un seri di pregunta ku el a hasi relashoná ku limpiesa i mantenshon di playanan. Segun e minister, el a risibí reklamo di habitantenan pa loke ta piedranan ku tin partikularmente na e playanan di Caracasbaai, Boka Sami i Daaibooi.

Playa “Pirate Bay” no ta ser mantené dor di Servisionan di Gobièrnu pa motibu ku algun di nan proyektonan ta den man privá.

Cleopa a puntra si tin un plan pa atendé ku e problema aki. E minister t splika ku, ora bientu ta kontrali (zùitwèst) bo ta haña e situashon ku piedranan ta keda bentá riba playanan, pero esaki ta un obra di naturalesa, i lamentablemente na e momentunan aki no tin un plan disponibel.

Pa loke ta e maneho pa ku playanan públiko na Kòrsou segun Jesus-Leito, Servisio di GMN aktualmente ta pasa kada playa públiko ku e frekuensia di 4 biaha pa siman pa rekohé sushi, harpa i snui palunan. Pero e tin di remarká ku e loke bishitantenan laga atras despues di a bandoná e playanan ta laga hopi di deseá.

E mandatario tin komprenshon ku e kantidat di piedranan den laman ta stroba bishitantenan di kana den awa. Pero pa rekohé e piedranan riba playa lo mester di fondo pa buska ekiponan pisá. Pa saka piedranan den laman lo mester saka nan na man, kual ta nifiká ku esaki tambe ta rekerí fondo pa paga hende.