WILLEMSTAD. - Den un komunikado emití pa prensa ayera anochi, Gobièrnu di Kòrsou ta informá di no tin intenshon pa baha penshun di behes, ounke ku realidat ta ku e pandemia di COVID-19 a pone ku aktividatnan ekonómiko na Kòrsou a baha supstansialmente i konsekuentemente entrada di e fondo di AOV tambe ta baha.

Ta konosí ku ora ekonomia ta bai malu, esaki ta nifiká ku ta ménos ta e hendenan ku ta aportá pagando prima. Di otro banda t’asina ku e fondonan si mester sigui kumpli ku pagonan na penshonadonan, dunadónan di kuido etcetera.

P’esei SVB a hañ’é obligá na formulá alternativanan pa garantisá ku por sigui paga AOV.

SVB den kuadro di redukshon di su gastunan ta konsiderando pa redusí penshun di behes (AOV) i tambe AWW ku 10%, kita bónus di fin di aña i hisa edat di penshun na 67. Esei ta loke e Banko di Seguro Sosial ta menshoná den un rapòrt ku el a emití na luna di desèmber último.

Den nan komunikado, Gobièrnu a pone komo  punto di salida ku lo no tuma ningun desishon ku ta afektá forsa finansiero di penshonadonan.

Pues penshonadonan por keda trankil pasobra lo no mishi ku nan penshun.