Gobernador Sra. Lucille George-Wout:

WILLEMSTAD.- Su Ekselensia Gobernador Sra. Lucille George-Wout a mustra riba e echo ku dia 19 di mart mayoria di e pueblo di Kòrsou a hasi uso di nan derecho demokrátiko di vota. Esei tabata importante. E gobièrnu ku ta bai drenta awor lo tin e responsabilidat pisá pa entre otro gana e ekonomia ku barbaramente e krísis di Corona a suta, riba pia atrobe.

Último tempu a mustra ku kooperashon konstruktivo denter di reino por kontribuí. Resientemente Sekretario di Estado Knops tambe a deskribí e kooperashon ku e palabra ‘huntu’; ta solamente huntu nos por progresá den reino.

Den liña ku e medidanan vigente, a disidí ku e aña akí, meskos ku aña pasá, lo no por tin e resepshon na okashon di Dia di Aña di Rei, ni por lo pronto Weganan di Rei, ni entrega di kondekorashon. Anteriormente Gobernador a  transmití e mensahe akí na 32 siudadano di Kòrsou, na nòmber di Su Mahestat Willem-Alexander, ku nan lo risibí un kondekorashon real pa nan hopi aña di servisio spesial na komunidat di Kòrsou.

Ta un plaser pa Gobernador felisitá un biaha mas e dekoradonan ku nan honorabel distinshon. ‘Mi ta spera e momento yega ku mi por topa no solamente e dekoradonan, sino boso tur atrobe, pa nos brasa otro’, Gobernador a duna di konosé.

Finalmente Gobernador Sra. Lucille George-Wout a brinda pa salú di Mahestat Rei Willem-Alexander i e méritonan di dekoradonan.

Di e forma aki a selebrá Dia di Rei 2021 na kas, na distansia, pero huntu.