WILLEMSTAD. - Pa aspektonan di seguridat Gobièrnu di Kòrsou ta konsehá pa evakuá áreanan na kosta i tambe áreanan ku ta inundá.

Minister Gilmar Pisas ayera a trese dilanti ku ta konsehabel pa tur persona ku ta biba den áreanan na kosta, bai temporalmente serka un famia o konosí. Esaki ta konta tambe pa personanan ku ta biba den barionan ku normalmente ta inundá ora ku tin hopi áwaseru.

Pa loke ta trata uso di shèlter t’asina ku mester konsiderá ku uso di shèlter ta e último refugio.

Pues den kaso ku un persona no tin niun otro opshon i kaminda ku e ta, no ta seif, e persona aki mester purba akudí serka famia òf konosí promé ku e opta pa bai un shèlter.

Gobièrnu a anunsiá  ku tin shèlter disponibel na entre otro, Maris Stella SBO na Grebbelinieweg, Eligia Martier SBO na Oosterbeekstraat, Rode Kruis na Barber, Weg naar Wespunt  i Kolegio Annie Koenraad na Kaya Tera Kora.

Durante dia di awe Gobièrnu lo informá e puntonan di kontakto pa hasi uso di e shèlter.

Warda Kosta

En konekshon ku e anunsio di Kódigo Kòrá, Warda Kosta ta konsehá na tur usuarionan di laman, ku énfasis pa tur propietarionan di boto chikí, boto piskadó i di plaser o sea deportistanan akuátiko pa no subi laman.

Gobièrnu ta pidi pa tuma medidanan di prekoushon nesesario pa sigurá botonan i ta konsehá pa saka e botonan na tempu for di awa i pone esaki na un forma o lugá sigurá.