Gobièrnu tei buska alternativa pa garantisá futuro di refineria

WILLEMSTAD. – Durante di e último simannan tantu via karta komo den kombersashon ku MDPT a notifiká GZE ku Kòrsou lo sali en buska di alternativa. Den e kuadro aki a konsiderá e kombersashon ku Baota komo parti di Kòrsou su búskeda pa un alternativa viabel pa garantisá futuro di nos refineria. Gobièrnu di Kòrsou no ta konsiderá su akshon komo kiebro di kontrakt debí ku dor di nulifika e akuerdonan, kualke klóusula den e akuerdonan aki ta no eksistente.

A start plan di kontigensha i awor ta aseler’é

MDPT entretantu a inisiá e plan di kontingensha pa buska un partner stratégiko ku tin e kapasidat pa por realisá modernisashon di nos refineria. Ta finalisando e asina yama ‘terms of reference’ pa buska entidatnan spesialisá den industria petrolero pa enkaminá e búskeda aki pa un partner adekuá. Parti di e enkargo lo ta tambe pa buska un partner dado kaso PDVSA no por mantené e refineria habri te ku fin di 2019. Un tipo di búskeda asin’aki ta tuma en general alrededor di dos aña. Esaki ta suprayá e urgensha pa nulifika e akuerdonan ku GZE. Si no hasi esaki, no por tin ningun negoshashon ku terser parti ku no ta GZE. Gobièrnu pa medio di MDPT lo keda dispuesto na papia ku GZE pero riba un base boluntario, sin ku ta mara nos i sin ku esaki ta eksklusivamente ku GZE. Mester añadí ku Baota un kompania priva presentá pa GZE sigur ta un alternativa interesante, pero Baota lo mester pasa den proseso pa por bin na remarke i no mester ekskluí ku otro partidonan tambe ku ta interesá lo ser duna un oportunidat pa presentá nan plan.

Ainda no tin klaridat ku Titan por konstruí i ópera planta LNG

Pa loke ta e LNG plant, Titan e kompania ku a gana e destaho pa konstruí i ópera e planta di LNG na Bullenbaai, a haña dos siman desde e karta di MDPT di 15 di novèmber último pa indiká ku nan por kumpli ku nan obligashon pa konstruí i ópera e planta di LNG. Ainda Titan no a kontesta e preguntanan hasi den e karta aki. Anteriormente Titan a informá Refineria di Kòrsou i MDPT ku nan lo pasa e titulo di esun ku a gana e destaho pa konstruí i ópera e planta di LNG pa GZE. Refineria di Kòrsou i MDPT a kontesta Titan ku nan no ta bai di akuerdo ku esaki.

Basa riba e desishon ku a ser tuma den Konseho di Minister, minister di Asuntunan General enkargá ku refineria, Sr. Eugene Rhuggenaath lo duna splikashon na tur e partidonan konserní.

 

SHARE

LEAVE A REPLY