WILLEMSTAD.- Minister di Desaroyo Sosial, Labor I Bienestar Hensley Koeiman djabièrnè último durante konferensia di prensa di gobièrnu a splika ku te ainda tin polítikonan den koalishon ku ta kontra proyekto pa kultivá cannabis medisinal na Kòrsou. ‘Pa ki motibu? Mi no sa. Tabatin hende ku tabatin motibunan diferente ku nan ta bisa ku nan ta kontra. Nan ta bisa ku esaki tin algu di aber ku droga. Pero mi ta kere ku un bon splikashon lo yuda.’ Manera ta konosí minister di Salubridat Suzy Camelia-Römer a bin ku un plan pa kultivá cannabis na Kòrsou pa su efektonan medisinal. Segun partido PIN, e partido di Camelia-Römer, esaki por krea entre 1.500 pa 2.000 trabou bon pagá. Segun PIN cannabis medisinal, esta cannabis komo remedi, tin su kuadro i konsepto di lei kla den parlamento pa pasa tratamentu den reunion públiko. A studia e konsekuensianan internashonal. A kalkulá e efektonan ekonómiko. A prepará laboratorio i Inspekshon di Salú. A apuntá tereno. Pero e ainda e proyekto ta stanka.

Koeiman djabièrnè último a bisa: ‘Bou di hopi bon kontrol e proyekto por kuminsá. Pasobra nos klima ta hopi bon pa kultivá cannabis medisinal. Nos tin ku konsentrá pa hasi esei.’ Koeiman a bisa ku sigur mil hende por haña un trabou den e sektor. ‘Na e momentu aki nos tin mas ku 8000 hende ku ta kobra ònderstant. Si mil hende por traha den e trayekto esaki, lo ta hopi bon.’ Koeiman a splika ku mester tin otronan tambe. Pasobra e kultivashon ta hopi ‘high-tech’ den laboratorio ets. ‘Tin hopi nivel di trabou. Pero si mil hende ku awor ta kobra ònderstant por bai traha den e sektor, esaki lo ta hopi bon pa Kòrsou.’
Segun Koeiman e proyekto ta algu ku por yuda Kòrsou inmensamente. E ta di opinion ku dor di splikamentu hendenan ‘e echo real’ e proyekto por kuminsá. Koeiman: ‘E no ta algu ku ta hasi daño na nos pais. E ta algu puramente medisinal.’ E ke papia i konvensé tur hende ku no ta di akuerdo ku e plan. Manera ta konosí diferente parlamentario di koalishon no ta di akuerdo ku e plan.