Polis ta investigando un kaso di aksidente den tráfiko ku konsekuensia fatal ku a tuma lugá djabièrnè 23 di desèmber 2016 alrededor di 23.22’or.

Riba e fecha i ora en kestion un outo tabata kore riba Kaya Wilfrido Hermans den direkshon di Porta Blanku.

Dado momento shofùr di e outo aki a bai pasa un otro vehíkulo ku tabata kore su dilanti, na e banda robes. Na e momentu ei e banda robes i spil di e vehíkulo ku a bai pasa e otro a dal un peaton ku tabata kana na man robes di kaminda, tambe den direkshon di Porta Blanku. E víktima debí na e impakto, a bai resultá te den kura di un kas na man robes.

E shofùr ku a okashoná e aksidente, despues a lora bin bek pa wak kiko a pasa, pero no a topa ku e peaton.

Mesora el a akudí na warda di polis na Montana i einan duna polis di konosé ku el a kaba di dal un hende na pia, pero no ta enkontrá e persona aki.

Huntu ku polis i algun testigu a bai na e sitio di aksidente, i einan den kura di un kas a bin topa ku e hòmber Godfried Sipriano Martha, nase na Kòrsou dia 26 di sèptèmber 1964, ku ya no tabata duna señal di bida.

Dòkter di polis ku a presentá na e sitio a konstatá morto.

Ta trata di e di 19 morto den tráfiko pa e aña aki. Investigashon den e kaso ta kontinuá.