WILLEMSTAD.- Vários habitante di Doradosstraat a tuma kontakto ku Extra pa asina nan por trese nan mal kontentu dilanti. Nan ta sumamente indigná ku e desaroyo nobo na resort Baoase relashoná ku e pir, pasombra nan a sinta ku e gerensia den pasado i a indiká na nan ku e pir lo wòrdu drecha pero lo hasi esaki un "golf breaker". Sinembargo pa nan sorpresa awor ku trabounan ta tumando lugá na e pir, e abitantenan ta tumando nota ku esaki a wòrdu transformá den un isla kual no tabata e palabrashon. E habitantenan a bolbe aserká gerensia di Baoase i e bia aki nan a haña di tende ku ta minister a duna e hotèl pèrmit, pa por konstruí riba e tereno kaminda e pir ta.
Extra a kòmbersá ku un di e propietario nan di Baoase Luxury Resort kual ta sr. Van der Valk. Sr. Van der Valk a duna di konosé ku enbèrdat den pasado nan a sinta ku e abitantenan di den e área relashoná ku e desaroyonan pa ku e pir i e ta na altura ku tin algun di e habitantenan ku ta mal kontentu. Pero e hotèl a haña tur e pèrmitnan nesesario, p’asina por konstruí riba e tereno di e pir, e tereno ariba menshoná ta trata di un tereno ku ta “huurgrond”.
Mas aleu sr. Van der Valk ta di opinion ku loke ku nan ta hasiendo ta un invershon kuantioso, i ku lo trese benefisionan pa Kòrsou pa ku e parti di turismo. Tur loke ku nan hasi ta bai ku pèrmit di VVRP ademas e la indiká ku tur loke nan ta konstruyendo aktualmente no ta kosnan pèrmanènt. Por ehèmpel e kasita ku tin trahá aktualmente riba e tereno a wòrdu trahá ku kònteiner moda ku esaki por wòrdu kitá despues di tempu i sin hasi daño na e área.