...E kombinashon di foto por mira sr. Chirinos durante akshon di entrega karta na sekretario di estado Raymond Knops dia 3 sèptèmber último i tambe dia 11 yüni na SDK na momentu ku a reuní ku ámtenarnan riba kòrtamentu di 12.5% den kondishonnan sekundario relashoná ku fiansa den kuadro di COVID-19...

WILLEMSTAD.- Ayera tardi a drenta e notisia tristu ku e gran sindikalista sr. Mario “Tòti” Chirinos a fayesé.
EXTRA a papia ku presidente di sindikato STrAF (Duana), sr. Juan Lourens, sindikato ku Tòti a funda i te na su morto a militá komo visepresidente.
Sr. Lourens a duna di konosé ku Tòti tabata un dje fundadónan na 1994 di sindikato STrAF, despues di tabata den grupo di servisio di Duana den sindikato ABVO. Komo grupo di Duana den ABVO, Tòti, Begina, Wim van Lamoen i defuntu Charles a disidí pa lanta e sindikato di Aduana (STrAF). E tabata e promé presidente di STrAF. Tòti a keda den sindikato STrAF okupando diferente funshon konsekutivamente. Aktualmente ku el a fayesé, e tabata den e funshon di visepresidente.
Banda di esaki, Tòti ta un di esnan mas bieu ku a forma parti di plataforma di CGOA. El a okupá e funshon di presidente di CCVV na diferente okashon i awor ku el a fayesé, e tabata den e funshon di CCVV.
Tòti a yuda lanta e sindikato di Duana na Aruba, esta SADA.
Tòti a okupá e funshon di sekretario di bestür di ACU kasi pa 9 aña, e ta den organisashon di UPAH i aktualmente e tabata den e direktiva.
Sr. Lourens a sigui bisa ku sindikalismo ta den Tòti su kurason. Tòti ta hasi e trabou di sindikalismo ku amor sin niun klase di interes ku un mente pió ku un kòmpiuter. Semper Tòti tabata bon dokumentá, i ta trese dokumento komo prueba ku loke el a diskutí ku bo ta bèrdat.
Den último kombersashon ku sr. Lourens tabatin dos siman pasa ku Tòti, e sindikalista a hasi yamada dramátiko na su kolega Lourens, pa sigui hasi e trabou di sindikalismo sin ningun agènda skondí.
“Un hòmber alegre, semper kla pa yuda. Henter su bida el a pasa den kuerpo di Duana i a sigui tabatin kontakto ku e kuerpo”.
E doló ku básikamente e kuerpo tin ta ku lo no por tuma despedida di dje dor di situashon COVID.
“Morto di Tòti ta un pèrdida hopi grandi pa STrAF i sindikalismo en general. Un hende ku eksperensia vasto a bai. Un hende ku retirá, e ta na bida, por a kue telefòn yam’e i awor ku e no tei. Ta henter e “bagage” a bai aki”, ta loke ku sr. Lourens a deklará.
Algun siman atras Tòti a sinti un doló i ya pa ayera e no tei mas riba e mundu aki. Palabra di kondolensia na su famianan i tambe e kuerpo di Duana komo e mundu sindikal en partikular.