WILLEMSTAD.- Ayera a tuma lugá e gran apertura di Grand View Residence, ku ta un proyekto turístiko di New Winds Realty. Ta trata di un proyekto den área di Piscadera ku ta konsistí di ocho edifisio ku un total di 94 apartamento i penthouse. Kada apartamento tin dos kamber i dos baño. E penthouse tin tres kamber i tres baño. Pero e loke kisas ta hasi e proyekto aki èkstra spesial ta e bista sumamente bunita ku tin riba nos laman.

Di akuerdo ku Randy Neuman, ku ta propietario di New Winds Realty, un total 70 % ta destiná pa bende ku e intenshon pa wòrdu di hür den un ‘rental pool’ pa por lo ménos 10 luna pa aña. Pues e doño mes por hasi uso 2 luna pa aña di su apartamento. Un total 30 % ta destiná pa bende ku e intenshon pa e doño mes por biba den su apartamento. Ku e konsepto aki e proyekto ta aportá na nos turismo. Pues Gran View Residence ta enserá oportunidat pa trabou i housekeeping, maintaince i management.
New Winds Realty a haña e tereno na novèmber 2014 i na sèptèmber di 2017 a start ku e promé edifisio. Tin tres edifisio kompletamente kla, e di kuater ta kla pa 80 % i e di sinku edifisio ta den proseso.
Randy Neuman a kuminsá komo desaroyadó na 1989 na St. Maarten. Tres aña despues el a bin Kòrsou. Segun Neuman: “Den mundu di negoshi semper tin su periodo bon i ménos bon.” Pero pa mas ku 30 aña Neuman ta den su negoshi di real estate New Winds Realty i apesar di tur e 'red tape' ku tin den nos sistema semper New Winds Realty a logra pa kumpli ku nan proyektonan, ku ta kasi 35 proyekto.
Randy Neuman ta bisa ku e ta un di e poko yu'i nan di Kòrsou ku por a laga hopi sèn desaroyá den ekonomia di Kòrsou. Por ehèmpel New Winds Realty ta e promé ku a traha 'gated community' aki na Kòrsou. Awe 9 di mei 2019 otro proyekto grandi ta ser realisá.
Despues di mas ku trinta aña, hopi hende ta puntra kuantu aña mas Randy Neuman lo sigui invertí na Kòrsou. Riba e pregunta aki Neuman ta kontestá: “Bo mester wak kuantu tempu bo ke kontinuá, trahando duru i bou di hopi stress. Bo tin ku wak bo salú tambe i kisas ta yega un momentu ku mester stòp. Mi no ta kere ku mi tin ku demonstrá mas kiko mi por komo empresario. Mi a demostrá tur esaki atraves di 30 aña largu i ku mas ku 35 proyekto realisá.”
Pero tòg ainda Neuman tin un proyekto grandi mas den tapara. Ta trata di e proyekto Majestic Hotel & Apartments ku mester bini na Marichi. Majestic Apartment & Hotel lo bira un hotèl nobo ku ta brinda akomodashon luhoso i espasioso na turistanan. “Atrobe e parti di red tape ta esun ku tin henter e proyekto wantá”, Neuman ta bisa.
E ta di opinion ku meskos ku gobièrnu ta duna invershonista internashonal un ‘red carpet treatment’ pa nan invertí den nos pais, esaki mester por konta tambe pa tur nos invershonistanan lokal. Neuman ta spera di por keda kla ku e pèrmitnan pa pronto e por realisá esaki tambe. Esaki muy probabel lo mester bira e proyekto pa korona e obra di e Neuman su karera.