WILLEMSTAD.- Nos ta den e fase kulminante di Siman di Kultura, i komo tal hopi organisashon, grupo i skol ta serando ku festividat. Esaki tabata e kaso tambe ku e grupo di grandinan di sra. Josephine Martina, konosí komo “Yòyò Ala”. Ayera e grupo a selebrá su promé aniversario bou di guia di Yòyò Ala. Den kòmbersashon ku Yòyò Ala, el a splika EXTRA ku e grupo aki a kuminsá ku na chikí, pero ku denter di un aña di tempu el a yega na 30 persona di edat entre 60-93 aña.

Tur djaweps e miembronan dje grupo aki ta bini huntu i pasa henter dia partisipando na aktividatnan spesialmente pa grandi manera obra di man, ehersisio, bon kuné, charla riba tópikonan ku ta regardá hende di edat, pero tambe nan ta keiru. Den prinsipio tur esaki tabata pa su kuenta, pero miéntras e grupo a bira grandi ta nesesario pa duna un kontribushon chikí, pero ku ta bale la pena.

Durante e fiesta di ayera e grandinan a baila un ratu den kaya riba músika folklóriko. Esnan ku bishitá Yòyò Ala e dianan aki lo por atmirá e obranan ku a kompañá e dia pa sera Siman di Kultura.