Dynaf ta e kompania ku ta instalando e diferente posibilidatnan di karga outo eléktriko rònt Kòrsou. D-point manera nan yama. Heidi van Goens account manager di Dynaf a splika di nan trabou i kiko por spera di nan pronto, sigur mas di e stashonnan di karga outo aki. Tur esaki den kuadro di tene nos medio ambiente limpi i bai den direkshon di bèrdè.

Moveshon bèrdè...

Green area iniciative ta loke Dynaf ta full speed kuné, un proyekto ku nan a lansa aña pasa. Pa aklará kisas un persepshon ku ta biba, Heidi a bisa ku nan no ta un diler di e vehíkulonan eléktriko. Ta mas bien un kuestion di kua ta bin promé, e galiña òf e webu. Den kuadro 20 aña di eksistensia di Dynaf aña pasá, nan a primintí pueblo un proyekto di posishoná 20 stashon di karga outo rònt Kòrsou. Esei nan a logra tambe. I nan a logra esaki tambe segun Heidi. Ta trata di e D-point ku ta e marka di e stashonnan di karga aki. Ora tende e nòmber D-point mester pensa mesora riba stashon di karga pa outonan eléktriko. Komo tin e problema ku ta e galiña òf e webu promé, nan a kuminsá ku vehíkulonan eléktriko segunda mano, no mas bieu ku 3 aña pa kuminsá ku e movementu bèrdè. I banda di e 20 stashonnan di karga kombiná pa kompania i pa kas, tambe Dynaf a bin ku un inisiativa di Green Area. Heidi a splika mas aleu ku aña pasá ora el a kuminsá na Dynaf, el a nota ku nan tin 5 vehíkulo eléktriko ku nan ta kore bai bin kuné, bai serka kliente entre otro, pero no tabatin stashon di karga spesífiko. I den kombersashon ku e tim di maneho el a kumpli ku un proyekto piloto na nan ofisina mes ku ta literalmente un parkeerplaats bèrdè, kaminda un kliente por bin einan i karga su vehíkulo eléktriko. No ta trata aki di un parkeerplaats designá pa parker outonan eléktriko djis pasobra ta kore un, pero e ta un sitio designá pa para e karga e outo eléktriko. I p’esei tambe riba e lugá di parker ei tin poné bon kla ku ta parker outo ku ta karga so. E vehíkulo por para einan i karga i ora ta kla ta duna oportunidat pa otro hende para i karga nan vehíkulo.

I pa e aña aki segun Heidi, nan a primintí  20 área bèrdè mas, pero COVID a kai aden i kos a wanta un poko. Awor aki nan a sigui bèk i tin 6 área bèrdè den kombinashon ku e stashonnan di karga na kas. Nan ta keda positivo pa por yega e 20 e aña aki. Tin hopi kompania interesá pasobra dor di pone un área bèrdè na nan establesimentu, nan ta posishoná nan mes riba merkado komo pionero den e movementu bèrdè. Konsekuentemente segun Heidi, e kompania ku tin un área bèrdè ta demostrá di ta atraé un otro demografia di hende pa e kompania.

200 vehíkulo eléktriko...

Na Kòrsou aktualmente tin 200 vehíkulo eléktriko ta kore rònt ku ta basta. Ounke na Aruba tin 500 i na Boneiru tin 20. Dynaf su kompania prinsipal na na Kòrsou pero ta establesé na St Maarten i Aruba i ta duna servisio i produkto na Boneiru. Relashoná ku e promoshon serka dilernan di outo pa bin ku outonan eléktriko Kòrsou, Heidi van Goens a bisa ku resientemente nan a kuminsá ku e proyekto piloto den kuadro di e kampaña di moveshon bèrdè, teniendo na kuenta ku nan no ta un diler di outo pero un provedor di e stashonnan di karga outo eléktriko, a drenta un relashon ku Crown Automotive ku tin outo eléktriko. Den e kuadro aki Heidi a bisa ku esaki ta bunita di un relashon ku otro kompania pasobra ta mustra e bunitesa di traha huntu en bes di bringa otro ya ku huntu por logra e meta pa un medio ambiente mas mihó pa Kòrsou i tambe inovashon pa nos isla.

7 D-point...

Resumiendo por bisa ku tin mas di 25  stashon di karga outo i área bèrdè nan tin 7 total. E áreanan bèrdè i e stashonnan di karga ta plamá rònt Kòrsou. A kuminsá na Dynaf su ofisina prinsipal mes ku un aña pasá. Despues a sigui Esperamos Supermerkado ku ta e promé supermerkado na Kòrsou ku un ‘green area’. Loke ta bunita di e ‘green area’ na Esperamos segun Heidi ta ku e hendenan ku ta biba pariba a bai hasi nan kompas spesial na Esperamos, pasobra einan por a karga nan vehíkulonan eléktriko. E ta un sorto di merkadeo pa e kompania mes tambe, kaminda ta atraé kliente, E di tres área bèrdè tabata na Maduro & Curiels bank na Rooi Catootji, e di kuater tabata na Lanthùis Sabaneta di Carmabi ku por sierto ta e promé área bèrdè na Banda Bou, despues a sigui e di sinku na Karakter na Coral estate ku tambe ta e promé playa ku su área bèrdè. Despues a bin ‘lockdown’ debí na COVID-19 i tur kos a wanta un poko. Awor aki a sigui resien ku Chogogo resort na Jan Thiel ku ta bira e promé hotèl na Kòrsou ku e área bèrdè. E intenshon segun Heidi ta pa nan plama rònt Kòrsou i pa duna kada kompania ku ta un pionero den su industria e posibilidat aki. Awor aki falta restorant, ofisina di dòkter. Mas tantu stashon di karga tin, mas hende ta kumpra e vehíkulonan eléktriko i mas di e vehíkulonan ku tin, mas posibilidat pa stashon di karga ta bin.

Karga outo eléktriko na kas mes...

Kon ta karga e outonan eléktriko. Riba e punto aki Heidi van Goens a splika ku e vehíkulo eléktriko ta manera un telefòn. Ta un steker tin i ta hinka esaki den e vehíkulo eléktriko i karga esaki. E bunita ta ku por hasié anochi ora bo bai drumi i lanta mainta ku e outo karga. Asta por pone riba energia solar segun Heidi i asina ta skapa e parti di koriente i durante di dia ta karga e outo ku e energia di solo. E propietario di e outo mes ta determiná su kapasidat di karga e vehíkulo. Si ta un persona ku ta traha henter dia na kas i ta karga via di energia solar, no tin mester di subi e kapasidat di e kargamentu muchu haltu. Hopi bia tin e tendensia di pensa ku mester di un supercharger òf un fast charger pero teniendo na kuenta ku distansianan di Kòrsou ta basta kòrtiku, no tin mester di un stashon ku ta karga den 20 minüt i banda di esei, e persona por tin su stashon di karga na kas mes tambe.

Relashoná ku e stashon pa karga na kas, Heidi van Goens a splika ku promé ku instalá algu asina na kas, Dynaf ta hasi un inspekshon na e kas i ta duna konseho kiko pa hasi na e instalashon di koriente. I pa esun ku ta bai karga na un establesimentu kaminda tin e área bèrdè, Heidi a splika ku den sierto kaso e kliente mester di un token/un tipo di karchi ku ta skèn i haña akseso pa karga e vehíkulo. E doño di e establesimentu tambe tin un bista asina kuantu e stashon ta keda usa i kon i ki ora e por atraé e klientenan ei. Den futuro ta intenshon pa e bira algu mas komersial kaminda sea ta benta sèn den e mashin òf manera na Hulanda ta paga ku bo karchi. Te ainda e kargamentu di e outo ta grátis. Na Dynaf e kliente por hasi uso di e área pa 4 ora basta e saka un foto di e vehíkulo para na e área bèrdè i post riba media sosial i bisa di ta sostené e movementu bèrdè.

Normal nobo den e movementu bèrdè...

I ora mi karga mi outo eléktriko kuantu por kore kuné. Heidi van Goens a bisa ku tin hende ku pia poko pisa i bateria ta baha mas lihé. Heidi a duna un ehèmpel di un Fiat ku el a kore un bia di kantor bai Banda Bou i bin kantor bèk i ora el a yega e tabatin 60% ainda. Tur kos ta dependé si e hende kore ku èrko òf kore duru i mas e outonan avansá, mas largu por kore ku nan ora nan ta kargá.

Ku bista riba futuro Heidi ta kere ku esaki ta bira e normal nobo den e movementu bèrdè. Awor aki tin e opshon di kumpra outo eléktriko òf gasolin. Pero aki 10 aña kisas lo bira un outo eléktriko ku ta outo normal. E ta kere ku semper tin un grupo mas kouteloso ku e konsepto nobo aki. Hende a kustumbrá di bai pòmp di gasolin kada siman i algun minüt yena gasolin i bai kas. Pero awor tin e posibilidat ku anochi por karga e vehíkulo eléktriko na kas mes. E ta un kambio den estilo di bida i ku tempu e lo bira e normal.

Aplikashon...

Pa sa unda e stashonnan di karga eléktriko ta, Heidi a splika ku nan a kuminsá ku un kampaña di konsientisashon den kolaborashon ku EXTRA ku kuater video animá kaminda ta splika e konsepto di vehíkulo eléktriko, kiko un stashon di karga ta i kiko un área bèrdè ta i ta promové un app (aplikashon riba telefòn). I riba  e app ei por mira presis unda na Kòrsou tin un área bèrdè i asta por mira si e ta disponibel òf no. Ora kaba di karga e outo, bo ta haña un notifikashon riba bo telefòn ku e vehíkulo a kaba di karga i pa duna otro hende chèns.

Respetá lugá nan di parker designá...

Te kon leu nos hendenan ta respetá e área bèrdè. Si mira awor e lugá nan di stashoná outo designá pa hende hèndikèp no ta keda respetá. Heidi a bisa ku lamentablemente komo ku na Kòrsou no tin un lei vigente pa parkeo desabilitá, un hende ku ta ménos mobil no por yega fásil na un kompania. Tin hende no ta respetá esei, lamentablemente. I p’esei Dynaf a kuminsá ku e kampaña di konsientisashon kaminda ta purba konsientisá komunidat pa respetá e áreanan aki. Tin hende no tin kuné, i ni maske kon bèrdè òf blou e lugá di parkeerplaats ta no ta respetá. Pero ta spera ku lo respetá e área bèrdè aki.

Uni en bes di bringa otro...

Heidi ta sintié hopi orguyoso di forma parti di un kompania hopi inovativo kaminda e por kontribuí i duna su granito komo un hóben profeshonal na su isla. Nos isla tin hopi potensial i Kòrsou tin hopi rekurso fuerte manera solo, bientu, laman pero no ta hasi uso di forma optimal di e rekursonan aki. Heidi ta kere ku si konsientisá komunidat i purba traha mas tantu huntu en bes di bringa otro, nos ta yega hopi mas leu.