WILLEMSTAD.- Timo Brouwer propietario di e empresa ambiental i resiklahe Green Force ta preokupá ku e situashon mundial aktualmente. Preis di plèstik ta bahando di tal forma ku no ta benefisioso mas pa reprodusí ni eksportá esakinan.

E situashon ta losiguiente; si ántes tabatin mas di 100 instansia ku ta resiklá plèstik awor esaki a baha te na 5. Mas aleu e preisnan pa plèstik PET esta bòter di plèstik a baha drástikamente ku 82%.

Tin un dimas na demanda pa bòter di plèstik i p'esei e resiklahe di bòter di plèstik no ta keda tuma mas. Esaki a trese komo konsekuensia ku e empresanan ku ta resiklá plèstik a sera nan portanan ya ku e trabou i su eksportashon ta kosta muchu mas ku nan no por kubri nan gastunan.

Esun kulpabel di esaki ta petroli segun Timo Brouwer. Komo ku produkshon di bòter di plèstik tin mester di petroli, e preisnan abou di petroli tin influensia riba preisnan di resiklahe. Ya pa un tempu kaba ta muchu mas barata pa traha bòter di plèstik di petroli nobo ku resiklá e material. I banda di esaki awor a resultá ku ta mas barata pa traha bòternan di plèstik.

Esaki tin konsekuensianan desbentahoso pa e merkado di resiklahe i pa medio ambiente.

Timo Brouwer ta sigui splika ku dor di resiklá bòternan di plèstik., e ta spar 75% na energia kompará ku si traha e bòternan di plèstik for di petroli. Tur esaki ta kondusí na mas kalentamentu i sushedat di mundu. E tin un influensia direkto na e kantidat di sushi pasobra no ta prosesá plèstik mas i simplemente ta dump e afó. Nunka mas por hasi algu ku e sushi ei sin ku e tin un impakto negativo riba medio ambiente.

Empresanan di resiklahe manera Green Force a para tur invershon i awor ta puntrando nan mes si nan tin di stòp òf kontinuá. Nada ta mustra kue preisnan lo bai subi pronto. I komo tal, e futuro di e resiklahe di plèstik na Kòrsou i mundial ta bou di preshon enorme.

E úniko opshon ta pa supsidiá e resiklahe te ora e preisnan subi.