WILLEMSTAD.- Straño ta ku den tur e añanan nunka mi a tende un polítiko papia di kongreso. Kiko ta KONGRESO? Gregory Meyer di Partido KEM ta di opinion ku Kongreso ta dos hende di kada bario di Kòrsou i nan ta bai den Parlamento, nan ta bai kontrolá e 21 parlamentarionan. Na opinion di Gregory Meyer, niun minister òf parlamentario no por bende òf hasi nada sin un kongreso. Si tabatin kongreso lo bo kere ku nan por a bende UTS, sera ISLA, aseptá e subida di gasolin ku diesel i bende propiedat di pueblo , asina Meyer ta puntra. ‘Nunka, niun polítiko no ke pa bin kongreso, es mas si e gobièrnu no ta manehá bon kongreso ta vota kontra i bah’e. P’esei e polítikonan aki na Kòrsou tin miedu pa tin un sistema ku kongreso. Komunidat mester uni i pidi pa yega na un sistema di kongreso. Laga pueblo mes kontrolá Parlamento. tur doló kabes ku korupshon ta kaba, kòrda si ku kongreso no ta polítiko, bo ta simplemente un siudadano den Parlamento rònt mundu tin kongreso asta Hulanda Tweede Kamer. Djis tuma un ratu Google bo ta mira kiko ta trabou di kongreso.”

Kada dos aña ta kambia KONGRESO, mi ta kere si polítikonan tin Kòrsou na kurason nan no mester skonde òf tin miedu pa KONGRESO bin den Parlamento. Supuestamente nos parlamentarionan ta defensa di pueblo, pero bo no ta mira òf sinti esei. Meyer ta puntra; Kon ta posibel ku parlamentarionan ta laga un minister bende propiedat di pueblo? Asina aki kos lo bai sigui, pueblo tin ku sinta mira kosnan straño ta sigui sosodé riba Kòrsou. ‘Laga nos ban uni pa KONGRESO drenta Parlamento i mi sa sigur nan lo bai bisa hopi kos kontra KONGRESO pa e no drenta pero KONGRESO ta bini. Lugánan mas chikí ku Kòrsou tin’e. Pa bende kos di pueblo si Kòrsou no ta chikí! Pueblo laga nos ban habri nos wowo i ban uni tur kos por. KONGRESO tambe por.”