WILLEMSTAD.-Desishon pa loke ta trata skol awor ku fakansi a kaba ta ku skolnan ta keda será pa tur alumno djaluna 12 aprel próksimo. Pa djamars 13 di aprel skol ta kuminsá pa muchanan di grupo 8 i esnan ku mester pasa eksámen. Pues muchanan di grupo 8 i klas di eksámen si ta kuminsá bai skol otro siman djamars miéntras ku otro skolnan si ta keda será te fin di aprel, asina minister Croes di enseñansa a duna di konosé.

Minister Croes a bisa ku mester tene kuenta ku hopi faktor promé ku yega na desishon si ta sigui ku skol si òf no. Mester a papia ku e tim di epidemiologia, e komishon di evaluashon di eksámen, sindikato i direktivanan di skol. A deliberá durante di hopi ora ku direktivanan di skol pa tende kiko ta bai pasa. Minister Croes a sigui bisa ku salubridat di e dosente i di muchanan ta hopi importante. Tin tenshon i miedu den vèlt di enseñansa. Ademas mester tene kuenta ku derecho internashonal di mucha ku ta indiká ku mucha mester sigui enseñansa i p’esei ni por sera skol sin mas.